مزن وزیر شہباز شریف ءِ گشگ انت کہ اے ڈی بی پاکستان ءِ دیمروئی ءُ وشحالی ءِ سفر ءِ تہا مدام یک معتبریں شریکدار ءِ بوتگ

اسلام آباد۔27اگست (اے پی پی):مزن وزیر محمد شہباز شریف ءَ پاکستان ءِ گوما ایشیائی دیمروئی بینک ءِ دیریں شریکداری ءَ را ساڑات ءُ گوشت کہ ایشیائی دیمروئی بینک پاکستان ءِ دیمروئی ءُ وشھالی ءِ سفر ءَ مدام یک معتبریں شریک ءِ بوتگ۔ اے ڈی بی ءِ پاکستان ءِ بازیں مزنیں دیمروئی منصوبگ آنی تہ ءَ شریک بوھگ ءِ واھشت ملک ءِ معیشت ءِ واستہ انقلابی ثابت بیت۔ آئی ئَ اے ھیالانی درشانی اے ڈی بی ئِ صدر ماساتو کنڈا ئِ سروکی ئَ ڈل ئَ گوں تران کنان ئَ کت اَنت آئی ئَ چار شمبے ئِ روچ ئَ آئی ئَ گوں گند ئُُ نند کُت۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر ءَ اے ڈی بی ءِ صدر ءِ پاکستان ءَ آیگ ءِ سر ءَ وش آتک کتگ۔ آئی ءَ گوشت کہ پاکستان ءُ اے ڈی بی ریلوے، سرکاری ٹرانسپورٹ ءُ کان کنی ءِ شوبگ ءَ وتی شریکداری ءَ را گیش کت کن اَنت، ایشی ءَ چہ ملکی معیشت ءِ واستہ سک باز سیت مند بیت۔ مزن وزیر ءَ اے ڈی بی ءِ ڈل ءَ را حکومت ءِ پاکستان ءِ نیمگ ءَ چہ پیش کتگیں اصلاحات آنی بابت ءَ سرپد کت ایشی ءِ تہ ءَ ٹیکس ءِ آمدنی ءَ را گیش کنگ، توان ءِ شوبگ ءَ اصلاحات، مالیاتی استحکام ءَ را گہتر کنگ، موسمی بدلی ءِ تباہ کنوکیں اثر آنی ھلاپ ءَ گامگیج، بے ھدفیں سبسڈی آنی تہ ءَ کمی ءُ چاگردی رکھینگ ءِ تہ ءَ گیشی ھوار اِنت۔ ایشیائی دیمروئی بینک ءِ صدر ءَ ایشیائی دیمروئی بینک ءِ گوما پاکستان ءِ یک بنجاہی باسک ءِ بستار ءَ دراجیں سیادی ءُ حکومت ءِ پاکستان ءِ سرجمیں اصلاحات ءِ توسیپ کت ءُ پاکستان ءِ کمک ءَ را برجاہ دارگ ءِ واستہ بینک ءِ عزم ءِ سر ءَ پدا زور دات۔ آئی ءَ پاکستان ءَ بنیاتی ڈھانچہ ءِ دیمروئی، موسمیاتی بدلی ءِ شوبگ ءُ ادارگی اصلاحات ءِ تہ ءَ کمک ءَ را گیش کنگ ءِ واستہ بینک ءِ عزم ءِ نوک کت۔ گند ءُ نند ءَ وفاقی وزیر اقتصادی امور احد خان چیمہ، وفاقی وزیر خزانہ و محصولات محمد اورنگزیب ، وفاقی وزیر پاور ڈویژن سردار اویس احمد لغاری، وفاقی وزیر ریلوے حنیف عباسی، وزیر مملکت برائے خزانہ ءُ ریلوے گورنر بلال اظہار کیانی ءُ ٹوھیں سرکاری افسر ہم ساڑی بوتگ اَنت۔