مزن وزیر شہباز شریف ءِ گشگ انت کہ پاکستان ءُ بیلاروس ءِ نیام ءَ دوستی ءِ سیادی وھد ءِ گوما مھکم بوھگ ءَ انت

اسلام آباد۔27اگست (اے پی پی):مزن وزیر محمد شہباز شریف ءَ بیلاروس ءَ ہنرمندیں پاکستانی افرادی قوت ءَ را روزگار ءِ پجارینگ ءِ ھاتر ءَ دوئیں ملک آنی نیام ءَ یک مفاہمت نامہ ءِ سر ءَ دستخط کنگ ءِ وش اتک کنان ءَ گوشت کہ پاکستان ءُ بیلاروس ءِ نیام ءَ دوستی ءِ سیادی وھد ءِ گوزگ ءَ گوں مھکم بوھگ ءَ انت۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ بیلاروس ءِ تہی کارانی وزیر آئیون کبراکوف ءِ سروکی ءَ ڈل ءَ چار شمبے ءِ روچ ءَ مزن وزیر محمد شہباز شریف ءَ گوں گند ءُ نند کتگ۔ مزن وزیر ءَ پاکستان ءَ آیگ ءِ سر ءَ بیلاروس ءِ تہی کارانی وزیر ءَ را وش اتک کنان ءَ گوشت کہ پاکستان ءُ بیلاروس ءِ نیام ءَ دوستی ءِ سیادی است انت، وھد ءِ گوما ھم مھکم بوھگ ءَ انت۔ آئی ءَ اے سال ءَ بیلاروس ءِ تر ءُ تاب ءِ ذکر کتگ ءُ بیلاروس ءِ صدر الیگزینڈر لوکاشنکو ءِ واستہ نیکیں واھگ آنی درشان کتگ۔ آئی ءَ گوشت کہ بیلاروس ءِ تر ءُ تاب ءِ ساھت ءَ پاکستان ءُ بیلاروس ءِ نیام ءَ بازیں شوبگ آنی تہ ءَ کمک ءِ واستہ بازیں معاہدہ ءُ مفاہمت نامہ آنی سر ءَ دستخط کنگ بوت۔ آئی ءَ گوشت کہ من ءَ وشی اِنت کہ دوئیں ملک آناں اے ھوالگ ءَ مرچی یک مھکمی ءِ سر ءَ دستخط کتگ، ایشی ءِ سر ءَ منی بیلاروس ءِ تر ءُ تاب ءِ ساھت ءَ تپاک کنگ بوتگ کہ بیلاروس ءَ جتاجتائیں شوبگ آنی تہ ءَ پاکستان ءَ چہ ہنرمندیں مردم آناں روزگار ءِ موہ پجارینگ بہ بیت۔ مزن وزیر ءَ گوشت کہ ما بیلاروس ءِ صدر ءِ پاکستان ءِ تر ءُ تاب ءِ ودار ءَ آں۔ بیلاروس ءِ تہی کارانی وزیر ءَ مزن وزیر ءِ پاکستان ءَ گرمیں وش آتک ءُ مہمان داری ءِ سر ءَ شگر ءُ منت گپت۔ آئی ءَ بیلاروس ءِ صدر ءِ نیمگ ءَ چہ مزن وزیر ءَ را نیکیں واھگ آنی کلوہ سر کت۔ آئی ءَ پاکستان ءِ گوما کشت ءُ کشاری ءُ صنعت ءَ ھوار جتا جتائیں شوبگ آنی تہ ءَ کمک ءَ را گیش کنگ ءُ یکجائی ءَ کار کنگ ءِ واھشت ءِ درشان کت۔ آئی ءَ تر ءُ تاب ءِ ساھت ءَ وفاقی تہی کارانی وزیر محسن نقوی ءُ اوورسیز پاکستانی ءُ انسانی وسائل ءِ وفاقی وزیر چوہدری سالک حسین ءِ گوما گند ءُ نند ءِ ذکر کت ءُ گوشت کہ اے گند ءُ نند دوئیں ملک آنی نیام ءَ سیادی آناں دیم ءَ برگ ءِ واستہ سک باز کارآمد بوتگ انت۔ وفاقی تہی کارانی وزیر محسن نقوی ءَ مزن وزیر ءَ را ھال دات کہ بیلاروس ءِ تہی کارانی وزیر ءَ ڈل ءِ گوما نیشنل ڈیٹا بیس رجسٹریشن اتھارٹی ءِ ھم تر ءُ تاب کتگ۔ اوورسیز پاکستانی ءُ انسانی وسیلگ ءِ دیمروئی ءِ وفاقی وزیر چوہدری سالک ءَ گوشت کہ دوئیں ملک آنی نیام ءَ بیلاروس ءَ ہنرمندیں پاکستانی آں روان دیگ ءِ ھوالگ ءَ یک مفاہمت نامہ ءِ سر ءَ دستخط کنگ بوتگ ایشی ءَ پد ہنرمندیں پاکستانی آں بیلاروس ءَ روان دیگ ءِ عمل باقاعدگی ءَ بندات کنگ بیت۔ بیلاروس پاکستانی ہنرمندیں کارندہ آناں میڈیکل ءَ ھوار دگہ چاگردی سلامتی ءِ آسراتی ھم دات کنت۔ وفاقی تہی کارانی وزیر محسن نقوی، درملکیں پاکستانی ءُ انسانی وسائل ءِ دیمروئی ءِ وفاقی وزیر چوہدری سالق حسین، تہی کارانی وزیر طلال چوہدری، درملک ءِ پاکستانی ءُانسانی وسائل ءِ دیمروئی ءِ وزیر محمد عون چوہدری ءُ سرکاری مزنیں کارندہ ھم سرکاری دیوان ءِ سر ءَ ھوار اتنت۔