سیلاب ءِ آماچیں مردماں خیمہ ءُ المی ئیں چیز دیگ بوھگ ءَ انت، این ڈی ایم اے ءِ زوتیں ھال ءِ نظام ءَ چہ مردماں چہ در کنگ آسان بوتگ، کمکی گامگیج آنی پد ءَ تاوان ءِ اندازہ کنگ بیت، وفاقی وزیر عطا اللہ تارڑ

اسلام آباد۔27اگست (اے پی پی):وفاقی وزیر ءِ اطلاعات ءُ نشریات عطا اللہ تارڑ ءَ گشتگ کہ این ڈی ایم اے سیلاب ءِ آماچیں مردماں خیمہ ءُ دگہ المی چیز آنی پجارینگ ءَ انت، درستیں ایمنی ءِ گامگیج زورگ بوھگ ءَ انت، این ڈی ایم اے ءِ زوتیں ھال ءِ نظام ءِ سبب ءَ انخلاء آسان بوتگ، درستیں سیادی داروکیں ادارگ آنی رد ءَ کار کنگ بوھگ ءَ انت۔ ریلیف ءِ گامگیج زورگ ءَ انت گڈا مزن وزیر سیلاب ءَ چہ آماچیں دمگ آنی تر ءُ تاب ءَ ھم کنت۔ آئی ءَ چار شمبے ءِ روچ ءَ ڈی جی آئی ایس پی آر لیفٹیننٹ جنرل احمد شریف چوہدری ءُ این ڈی ایم اے ءِ چیئرمین لیفٹیننٹ جنرل انعم حیدر ملک ءِ گوما میڈیا ءَ گوں ھور ءُ سیلاب ءِ جاور ھال ءِ ھوالگ ءَ گپ ءُ تران کنگ ءَ ات۔ وفاقی وزیر ءَ گوشت کہ گوستگیں شپ ءَ پنجاب ءِ سئے دریا آنی تہ ءَ سیلاب ءِ جاور ھال پیداک بوتگ انت، این ڈی ایم اے ءَ پنجاب ڈزاسٹر مینجمنٹ اتھارٹی ءَ را سرجمی ءَ سرپد کتگ ءُ مدام رابطہ ءِ تہ ءَ بوتگ۔ آئی ءَ گوشت کہ گندا سنگھوالہ ءَ دریائے سلج ءَ آپ ءِ روانی گیش بوتگ، مرالہ ءَ دریائے چناب ءُ مرالہ ءَ چہ ہیڈ خانکی ءِ نیمگ ءَ آپ ءِ روانی گیش بوتگ، خانکی ءَ آپ ءِ روانی یک ملین کیوسک ءَ چہ گوستگ کہ نوں قادر آباد ءِ نیمگ ءَ روگ ءَ انت۔ این ڈی ایم اے ءَ دمگی واکدار ءُ ضلعی انتظامیہ ءَ را چہ دمگ ءَ در کنگ ءِ ھوالگ ءَ پیشگی سرپدی داتگ وھدے کہ آماچیں دمگاں وھد ءِ سر ءَ سرپدی دیگ بوھگ ءَ اِنت۔ وفاقی وزیر ءَ گوشت کہ مزن وزیر محمد شہباز شریف ءَ ھم مرچی سیلاب ءِ جاور ھال آنی ھوالگ ءَ دیوان ءِ سروکی ءَ کتگ، مزن وزیر ءَ زوتیں ھال ءِ نظام ءَ را گیش موثر جوڑ کنگ ءُ کمکی کار آناں ترند کنگ ءِ ہدایت کتگ ءُ لوٹ اتگیں چیز صوبہ پنجاب ءَ را زوت پجارینگ ءِ ہدایت کتگ۔ خیمہ ءُ دگہ المی ئیں سامان این ڈی ایم اے ءِ نیمگ ءَ چہ سر کنگ بوھگ ءَ انت۔ آئی ءَ گوشت کہ راوی دریا ءِ تہ ءَ جسر ءُ شھدرہ ءَ جاور ھال نسبتاً شرتر اَنت، البت ھمک ایمنی ءِ گامگیج زورگ بوھگ ءَ اَنت۔ صوبائی حکومت ءُ این ڈی ایم اے ءِ نیمگ ءَ چہ اے جاوراں گوں یکجاھی ءَ دیم پہ دیم بوھگ ءَ اِنت۔ مزن وزیر اے جیڈھ ءَ دائم سرپد اِنت ءُ مرچیگیں گند ءُ نند ءَ آئی ءَ را سئیں دریا آنی جاور ءُ آیوکیں 24 تاں 48کلاک موسم ءِ پیش گوئی آنی بابت ءَ ھم سرپد کنگ بوت۔ وفاقی وزیر ءَ گوشت کہ مزن وزیر سیلاب ءَ آماچیں ھند آنی تر ءُ تاب ءَ ھم کنت۔ آئی ءَ گوشت کہ زوتیں ھال ءِ نظام سک باز کارآمد ثابت بوتگ، ایشی ءِ آسر ءَ وھد ءِ سر ءَ یلہ کنگ ممکن بوتگ۔ این ڈی ایم اے گوستگیں بازیں ہفتگاں چہ صوبہ آنی گوما نزیکیں رابطہ ءَ انت۔ عطا اللہ تارڑ ءَ گوشت کہ پنجاب ءَ سیلاب ءِ جاور ھال آنی سر ءَ مُدام رپوٹ کنگ بوھگ ءَ اِنت، مزن وزیر ءَ را این ڈی ایم اے ءِ تیاری ءُ صوبگ آنی نیمگ ءَ چہ کوآرڈینیشن ءِ ھوالگ ءَ مُدام اپ ڈیٹ رسگ ءَ اِنت۔ آئی ءَ گوشت کہ مزن وزیر ءَ پیسر ءَ چہ اے گپ پدر کتگ کہ اے یک راجی پسہ یے، ایشی ءِ تہ ءَ پاک فوج ءُ توامیں ادارگ سرگرمی رنگ ءَ بھر زوری کنگ ءَ انت۔ آئی ءَ گوشت کہ آیوکیں روچ آنی تہ ءَ تاوان آنی اندازہ کنگ بیت ءُ تاوان آناں پدا زندگ کنگ ءَ را دل یکیمی کنگ بیت۔ آئی ءَ گوشت کہ ھاسیں تک ایش انت کہ مردم دریائی دمگ آنی تہ ءَ آبادی جوڑ کن انت، ایشی ءِ سر ءَ انتظامیہ ءَ را ھدایت کنگ بوتگ کہ دریائی دمگ آنی تہ ءَ جوڑیشت ءِ اجازت مہ دنت۔ قادر آباد ءِ دمگ ءَ یلہ کنگ ناگزیر اِنت ءُ یکجائی کوشست برجاہ اِنت۔ پی ڈی ایم اے ءَ را سرجمیں کمک دیگ بوھگ ءَ اِنت ءُ نیشنل ریسپانس ءِ چیر دستی ءَ جاور ھال ءَ را یکجاھی ءَ گوں گر ءُ دار کنگ بوھگ ءَ اِنت۔