پاکستان ءِ زرکار و زرکاری کن رکھوک ملک اس جوڑ کننگ کن سنبرینگوک اُن، وزیراعظم شہباز شریف نا جاپانی بینک انا عہدیدارتون اوڑدہی ٹی گپ وتران

اسلام آباد۔ 27 اگست (اے پی پی) وزیراعظم محمد شہباز شریف پارینے کہ پاکستان ءِ زرکار و زرکاری کن رکھوک ءُ ملک اس جوڑ کننگ کن سنبرینگوک اُن، پاکستان وجاپان نا نیام اٹ مستین اٹی صنعت و واپار نا بشخ اٹی پبی کمکاری مسنے، پاکستان جاپان تون سفارتی و زرگزرانی کمکاری ءِ قدر انا نظر اٹ ہرک۔ وزیراعظم آفس نا میڈیا ونگ آن جاری بیان نا رداٹ داخیال آتا درشانی ءِ او چارشنبے نادے آ جہانی کمکاری بینک انا شعبہ مائننگ و میٹل فنانس نا ڈائریکٹر جنرل تاروکاٹو تون گپ وتران کرساکرے ہراوزیراعظم تون داڑے اوڑدہی کرے۔ وزیراعظم پارے کہ پاکستان جاپان تون سفارتی و زرگزرانی کمکاری ءِ قدر انا نظر اٹ ہرک، پاکستان وجاپان نا نیام اٹ مستین اٹی صنعت وواپار نا بشخ اٹی پبی کمکاری مسنے ۔ ہڑتوم آ ملک آک زرگزرانی کمکاری نا تجدید نو کن سنبرینگوک ءُ۔ اوپارے کہ پاکستان جاپانی زرکارو بینک آتا پاکستان اٹ زرکاری کن ہرممکن آسراتی فراوان کیک۔ اوپارے کہ پاکستان کشت وکشار، آئی ٹی، ٹیکسٹائل وایلو بشخ آتیٹی جاپانی ٹیکنالوجی نا جدت و کسبی مہارت آن خاطرخواہ فائدہ ہرفنگ کیک، پاکستان اٹی بھلا زرگزرانی و شونداری ڈٹ آتیٹی جہانی مالیاتی ادارہ و جہانی کہول آ زرکارتینا پبی است خواہی نا درشانی و کمکاری فراوان کننگ ءُ۔ اوپارے کہ پاکستان نا اڑزان لیبر مارکیٹ جہانی زرکارءِ مسابقتی چاگڑد فراوان کیک، پاکستان ءِ زرکار و زرکاری کن رکھوک ءُ ملک اس جوڑ کننگ کن سنبرینگوک اُن۔ جاپان نا جہانی کمکاری بینک انا شعبہ مائننگ و میٹل فائنانس نا ڈائریکٹر جنرل تارو کاٹو پاکستان اٹ مہمانداری آ حکومت پاکستان و پاکستانی الس نا منت واری ءِ ہرفے و جاپان نا زرکار و بینک آتا پاکستان اٹی زرگزرانی پروجیکٹ اٹی ودوک آ است خواہی و کمکاری ءِ پین ودفنگ نا است خواہی نا درشانی ءِ کرے۔