مصنوعی ذہانت ملازم آتے چٹفپک بلکن روزگار نا جہانی منظرنامہ ءِ نمان وڑاٹ پوسکن ءُ دروشم اس ایتک، بنجائی وزیر آئی ٹی شزہ فاطمہ خواجہ

اسلام آباد۔ 27 اگست (اے پی پی) بنجائی وزیر انفارمیشن ٹیکنالوجی اینڈ ٹیلی کمیونیکیشن شزہ فاطمہ خواجہ ورناتے پوسکن آ ٹیکنالوجی ٹی مہارت دوئی کننگ نا گرج آ زور شاغسا پارینے کہ مصنوعی ذہانت (اے آئی ) ملازمت آتے چٹفپک بلکن روزگار نا جہانی منظرنامہ ءِ نمان وڑاٹ پوسکن ءُ دروشم اس ایتک، حکومت سائبرسیکورٹی ءِ سوگو کننگ، ای لرننگ ءِ ودفنگ و پاکستان نا ورناتے آخبت نا روزگار نا منڈی کن تیار کننگ کن کسب آ تالان وارخواہی فراوان کننگ کن سنبرینگوک ءِ۔ چارشنبے نادے آ کیڈٹ کالج حسن ابدال اٹی اسہ دود اسے آن تران کرسا اوپارے کہ آخبت اٹ روزگار نا وارخواہی ہموفتا مریک ہرا مصنوعات ذہانت نا ٹول و ٹیکنالوجی تے گچین وڑاٹ کاریم اٹ اتنگ کیرہ، سوج دادااف کہ کے آئی ملازمت آتا جاگہ ءِ ہلیک بلکن دادے کہ انت ننا ورناک دا مون آ بروک ٹیکنالوجی تے تینا کننگ و اوفتاکماشی ءِ کننگ کن تیار ءُ۔ اوپارے کہ کیڈٹ کالج حسن ابدال تون دستخط کروک ایم او یو نا رداٹ بڑزکو لائخی تخوک ورناتے انٹرن شپ و تربیت نا وارخواہی ہم فراوان کننگک تانکہ او تینا تعلیم ءِ پورو کننگ آن پد کسبی میدان اٹی آسانی اٹ منتقل مننگ کیر۔ بنجائی وزیرپارے کہ ایم او یونا رداٹ سائبرسیکورٹی ، مصنوعی ذہانت ، کوڈنگ و مواد ٹیکنالوجی کون آ بشخ آتیٹی چندی سرٹیفکیشن پروگرام نا بناءِ کننگک، بڑزکو کارکڑد نشان تروک آ طالب علم آتے چندی ہند آتیا انٹرن شپ نا وارخواہی ہم فراوان کننگک۔