وزیرداخلہ محسن نقوی نا نیشنل پولیس اکیڈمی نا دورہ، ہاسٹل 5 تُو اٹی پورو کننگ ناپارت

اسلام آباد۔ 27 اگست (اے پی پی) بنجائی وزیر داخلہ محسن نقوی نیشنل پولیس اکیڈمی نا دورہ ٹی اکیڈمی نا اپ گریڈیشن نا پروجیکٹ ءِ ترند کننگ، 126 کمرہ غاتیا تالان یانزدہ مزل نا ہاسٹل ءِ پنچ تُو اٹی پورو کننگ، زیرتربیت آفیسر آتا ایف آئی اے، فرانزک ایجنسی و ایلو ادارہ غاتیان اٹیچمنٹ نا فیصلہ غاتیا پیش رفت نا جاچ ءِ ہلنگ و نیشنل کمانڈکورس پورو کروک آاے ایس پی تے ایم ایس کریمنالوجی و پولیس اسٹڈیز ناڈگری تننگ نا منظوری تون اوار چندی اہم گام گیج آتا پڑو ءِ کرے۔ وزیرداخلہ محسن نقوی نیشنل پولیس اکیڈمی ٹی زیرتعمیر ہاسٹل ناکاریم نا معائنہ ءِ کرے و پارت کرے کہ تعمیراتی رفتار تون آب آ ہم ہچ ءُ سمجھوتہ اس کننگپ۔ اوسوئمنگ پول نا دورہ ءِ کرے ، زیر تربیت آفیسر آتا نیام اٹ مروک آ سوئمنگ مقابلہ ءِ ہرا و پروبیشنر ز و انسٹرکٹرآتا است بڈی ءِ کرے۔ اوکان پد وزیرداخلہ زیرتربیت آفیسر آتا کلاس روم تا دورہ ءِ کرے۔ اوفتے تون اوڑدہی کرے و آفیسر ز میس اٹی اے ایس پی تتون تولسا کُن وخور نا ہم جاچ ءِ ہلک۔ محسن نقوی زیرتربیت آفیسر آتا سلاہ ءِ ہم بِنگ و آسراتی تیٹی گچینی نا بابت گام گیج کننگ نا باوری کرفے۔ داوخت آ وزیرداخلہ نیشنل پولیس اکیڈمی ٹی دیوان نا کماشی ءِ کرے ہراٹی ادارہ نا پوسکن تنظیم و تدوک آ دیوان اٹی کروک آ فیصلہ غاتیا عملدرآمد نا پیش رفت نا سرجمی اٹ جاچ ءِ ہلنگا۔ حوال اٹی پاننگاکہ ہیلکاری پروگرام تھانہ نا باقاعدہ دورہ، سیف سٹی پروجیکٹ، ایف آئی اے ، سائبرکرائم و فرانزک نا بشخ آتیٹی اٹیچمنٹ اوار کننگانے۔ زیرتربیت اے ایس پیز نیشنل پولیس اکیڈمی ٹی آسراتی تا گچینی آ وزیرداخلہ محسن نقوی نا منت واری ءِ ہرفے۔ دورہ نا وخت آ ڈپٹی کمانڈنٹ نیشنل پولیس اکیڈمی، چیف کمشنر اسلام آباد، ممبر انجینئرنگ سی ڈی اے و ایلو بڑزکو کمامدارآک ہم ساڑی ئسر۔