بنجائی حکومت پنجاب اٹی ساڑی آ نوکاپی حالیت آتیٹی پبی کمک کیک، گجرات، سیالکوٹ، لاہور اٹی گمانی اربن فلڈنگ تون مون تننگ کن غٹ المی بست وبندی گام گیج کننگے، وزیراعظم شہباز شریف

اسلام آباد۔ 27 اگست (اے پی پی) وزیراعظم محمد شہباز شریف پارینے کہ بنجائی حکومت خیبرپختونخوا ٹی ساڑی آنوکاپی حالیت آتا رداٹ ہرممکن کمکاری فراوان کرے، پنجاب اٹی ہم بنجائی حکومت پبی کمک کیک، گجرات، سیالکوٹ، لاہور اٹی اربن فلڈنگ نا گمانی حالیت آتون مون تننگ کن غٹ المی بست وبندی گام گیج آتے دمدستی وڑاٹ ہرفنگے، السی نمائندہ و حکومتی ادارہ غاک نوکاپ آن زہمی علاقہ غاتیٹی وخت آ کشنگ، رکھوک ہند آتیا گدریفنگ و کمکی کارروائی تا گچین چاروکی ءِ کیر۔ چارشنبے نادے آوزیراعظم آفس نا میڈیا ونگ آن جاری بیان نا رداٹ اوداخیال آتا درشانی ءِ پنجاب اٹی ترند پِر و دریائے راوی، ستلج و چناب اٹی نوکاپی حالیت آتا رداٹ ودی مروک آ ویل و داتم اسکان نا گام گیج آتیا جاچ دیوان نا کماشی ءِ کرساکرے۔ دیوان اٹی بنجائی وزیر ڈٹ بندی و شونداری احسن اقبال ، بنجائی وزیر توانائی اویس احمد لغاری، بنجائی وزیر موسمیاتی بدلی ڈاکٹر مصدق ملک ، بنجائی وزیر حوالکاری وشینکاری عطاء اللہ تارڑ، بنجائی وزیر اقتصادی امور ڈویژن احدخان چیمہ، چیئرمین این ڈی ایم اے و تعلقدار سرکاری کمامدارآک بشخ ہلکر۔ دیوان اٹی چیئرمین این ڈی ایم اے لیفٹیننٹ جنرل انعام حید رملک وزیراعظم ءِ دریاتیٹی نوکاپی حالیت و زہمی علاقہ غاتیٹی پیشگی کشنگ، رکھوک ہند آتیا گدریفنگ و کمکی گڑاتا فراوانی آ حوال تس۔ چیئرمین این ڈی ایم اے پارے کہ ریسکیو 1122، سول ڈیفنس، رینجرز، پی ڈی ایم اے و غٹ ایلو تعلقدار ادارہ غاک پورو مستعدی اٹ کاریم کننگ ءُ۔ حوال اٹی مستی پاننگاکہ پنجاب نا گڑاس علاقہ غاتیٹی نوکاپی حالیت آتا نسخان تیان بچنگ کن پیشگی کشنگ کن آرمی نا ورناو پولیس نا خذمت ءِ دوئی کننگانے۔ دیوان ءِ پاننگاکہ دریائے چناب اٹی دیرانا پیش تمنگ نا ودنگ نا رداٹ ہیڈ مرالہ و خانکی نا ہند آ بڑزکو درجہ نانوکاپ نا گڑتی ءِ، زہمی تا وخت آ کشنگ کن 2000 ٹرک تننگانے تانکہ ہروڑنا حالیت آتون مون تننگ کن تیار سلر، دریائے راوی ٹی جسٹر و شاہدرہ و دریائے ستلج اٹی گنڈاسنگھ والا و سلیمانکی نا ہند آ دِیر انا پیش تمنگ نا زیات زور ءِ،خانکی ، بلوکی و قادر آباد اٹی دِیر انا پیش تمنگ آن ودی مروک آ زور انا چاروکی ءِ کننگ انگ ءِ۔ وزیراعظم پارے کہ تدوک آ دے بنجائی حکومت و این ڈی ایم اے نا کنڈآن نوکاپی حالیت و پِر تا وارننگ نا میڈیا ٹی وخت آ پیشگی حوال نہادی جونی و مالی نسخان تے بچفے، پیشگی حوال سرکننگ نا دا چرجوئی ءِ پین گچین وڑاٹ برجاتخنگے، این ڈی ایم اے داتم اسکان پنجاب نا زہمی علاقہ غاتیکن 5 ہزار تمبو تسنے ایلو المی آ گڑاتا فراوانی ءِ ہم برجاتخنگے، گجرات، سیالکوٹ، لاہور اٹی اربن فلڈنگ نا گمانی حالیت آتون مون تننگ کن غٹ المی بست وبندی گام گیج آتے دمدستی وڑاٹ کننگے، پنجاب اٹی نوکاپی حالیت آتا رداٹ بجلی نا بے سلنگ آن فراوانی، ذرائع مواصلات و سڑک آتا بحالی کن وزیر مواصلات وزیر توانائی، سیکرٹری توانائی و چیئرمین این ایچ اے ، لاہور سرمرسا صوبائی حکومت تون عملی و پبی کمک کیر۔ وزیراعظم پارے کہ صوبہ سے ٹی نوکاپی حالیت آتیان ودی مروک آ ویل آتے ملکی کہول آ پورو ہم گرنچی اٹ ایسر کننگک، بنجائی حکومت خیبرپختونخواٹی ساڑی آ نوکاپی حالیت آتا رداٹ ہر ممکن کمک فراوان کرے، پنجاب اٹی ہم بنجائی حکومت پبی کمک کیک۔ وزیراعظم پارت کرے کہ سندھ اٹی نوکاپی ریلہ نا پنجاب آن پد بننگ نا ہروخت پیشگی حوال ءِ پک کننگے تانکہ گمانی نسخان تیان بچنگ مرے۔ السی نمائندگان و حکومتی ادارہ غاک نوکاپ آن زہمی علاقہ غاتیٹی وخت آ کشنگ، رکھوک ہند آتیا گدریفنگ و کمکی کارروائی تا گچین چاروکی ءِ کیر۔ نوکاپی حالیت آتا رداٹ انسانی جون ومال، فصل و ساہدار تے گمانی نسخان تیان بچفنگ کن گچین حکمت عملی نا رداٹ رکھی گام گیج کننگے، نوکاپی حالیت آتیان اِرٹ چار غٹ ضلع و تحصیل نا کہول آ مون تروک ویل آتے ہندی و صوبائی انتظامیہ تون اواری اٹ ہلہلہ ئی بنداو تیا ایسر کننگے۔