نیشنل ایمرجنسیز آپریشن سینٹر دریاتیٹی بھلا نوکاپی حالیت آتا سوب 24 گھنٹہ کن پورو فعال ءِ، این ڈی ایم اے

اسلام آباد۔ 27 اگست (اے پی پی) نیشنل ڈیزاسٹر مینجمنٹ اتھارٹی (این ڈی ایم اے) نا نیشنل ایمرجنسیز آپریشن سینٹر دریائے چناب، راوی و ستلج اٹی بھلا نوکاپی حالیت آتا سوب 24 گھنٹہ کن پورو فعال ءِ، وزیراعظم نا پارت آ این ڈی ایم اے غٹ ریسکیو و ریلیف سرجزآتا چاروکی ءِ کننگ ءِ و سول و عسکری ادارہ غاتون رابطہ ٹی ءِ۔ چارشنبے نادے آ این ڈی ایم اے نا کنڈآن بیان نا رداٹ دریائے چناب اٹی مرالہ غا 7 لکھ 69 ہزار 481 کیوسک نا بے کچ بڑزکو درجہ نا نوکاپی ریلہ ساڑی ہراپین زیات مننگ کیک، دریائے چناب اٹی خانکی نا ہند آ 7 لکھ 5 ہزار 225 کیوسک نا بے کچ بڑزکو درجہ نا نوکاپی ریلہ ساڑی، ہرانا وہینگ کم مننگ ءِ، دریائے راوی ٹی جسرنا ہند آ 2 لکھ 2 ہزار 200 کیوسک نا بڑزکو درجہ نا نوکاپی ریلہ گدرینگ انگ ءِ ہرا 2 لکھ 29 ہزار 700 کیوسک آ سرمننگ کیک، دریائے راوی ٹی شاہدرہ نا ہند آ 72900 کیوسک نا وہینگ برجاء، نوکاپی ریلہ نا سوب آن شاہدرہ، پارک ویو و موٹروے ٹونا شیفکو علاقہ غاتیٹی نوکاپ نا خطرہ ءِ، دریائے ستلج اٹی گنڈاسنگھ والا نا ہند آ 2.45 لکھ کیوسک نا بے کچ بڑزکو درجہ نا نوکاپی ریلہ برقرار ءِ، دریائے ستلج اٹی سلیمانکی نا ہند آ ساڑی آ وہینگ 1 لکھ 355 کیوسک نوکاپی ریلہ برقرار ءِ۔ بیان نا رداٹ وزیراعظم نا پارت آ این ڈی ایم اے غٹ ریسکیو و ریلیف سرجزآتا چاروکی ءِ کننگ ءِ، نیشنل ایمرجنسیز آپریشن سینٹر 24 گھنٹہ کن پورو فعال ءِ ، این ڈی ایم اے سول و عسکری ادارہ غاتون رابطہ ٹی ءِ۔ این ڈی ایم اے پارے کہ دریاتا کنارہ و واٹر ویز آ رہینگوک آ بندغ آک دمدستی وڑاٹ رکھوک ہند آتیا کار، ہندی انتظامیہ نا پارت آتیا دمدستی عمل کیر وہلہلہ ئی حالیت آتیٹی کمکی ٹیم آتون رابطہ کیر، نوکاپ زدہ علاقہ غاتیٹی بے گرج سفر آن پورو پاناد کیر، ہلہلہ ئی کٹ(دِیر، خور، دوائی) تے تیارتخر و اہم دستاویز آتے رکھ تخر۔ پین راہشونی کن این ڈی ایم اے ڈیزاسٹر الرٹ ایپ ءِ کاریم اٹ اتیر۔