مزن وزیر محمد شہباز شریف ءَ سیلاب ءِ آماچیں دمگاں کپتگیں مردمانی درکنگ ءِ آپریشن ءَ را ترند کنگ ءِ پنت ءُ شون کتگ، آماچیں دمگاں وردن ءُ وراک، درمان ءُ چادر ءِ پجاری ءَ را دل یکیمی کنگ بہ بیت

اسلام آباد۔26اگست (اے پی پی): مزن وزیر محمد شہباز شریف ءَ سیلاب ءَ چہ آماچیں دمگاں بندیں مردم آناں یلہ کنگ ءِ واستہ جاری آپریشن ءَ را ترند کنگ ءِ پنت ءُ شون کتگ ءُ آماچیں دمگاں وردن ءُ وراک ءُ درمان ءُ تمبو ءِ پجاری ءَ را دل یکیمی کنگ بہ بیت۔ سئے شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ ملک ءِ جتا جتائیں دمگ آنی تہ ءَ سیلاب ءِ جاور ھال ءُ ریلیف آپریشن آنی ھوالگ ءَ مزن وزیر محمد شہباز شریف ءِ سروکی ءَ چار ءُ تپاسی دیوان برجم دارگ بوت۔ مزن وزیر ءَ دیوان ءَ گوں گشتانک دیان ءَ دریائے ستلج ءِ سیلاب ءَ چہ آماچیں پنجاب ءِ ضلع آں ریسکیو آپریشن ءَ را ترند کنگ ءِ پنت ءُ شون دات۔ آئی ءَ پنت ءُ شون کت کہ سیلاب ءَ چہ آماچیں دمگ آنی تہ ءَ بندیں مردم آنی در کنگ ءِ واستہ جاری آپریشن ءَ را گیش ترند کنگ بہ بیت، آماچیں دمگ آنی تہ ءَ وردن ءُ وراک، دوائی ءُ تمبو آنی پھجاری ءَ را دل یکیمی کنگ بہ بیت ءُ پنجاب ڈیزاسٹر مینجمنٹ اتھارٹی ءِ گوما سرجمیں رنگ ءَ رابطہ ءَ برجم دارگ بہ بیت۔ دیوان ءَ ملک ءَ سیلاب ءِ جاور ءُ کمکی کار آنی بابت ءَ سرپدی دیگ ءِ وھد ءَ گوشگ بوت کہ ستلج دریا ءَ سیلاب ءِ ھوالگ ءَ پیشگی ھال آنی سبب ءَ آبادی ءِ کشگ ءِ سبب ءَ آماچیں دمگ آنی تہ ءَ تاں انوگ ءَ ھچ وڑیں جانی تاوان ءِ ھال نہ بوتگ۔ ستلج دریا ءِ سیلاب ءَ چہ آماچیں ضلع آنی تہ ءَ سیادی داروکیں ادارگ آنی ریسکیو آپریشن برجاہ اِنت، تاں انوگ ءَ 174074 مردم ایمنیں جاھاں سر کنگ بوتگ اَنت۔ مزن وزیر ءَ را ھال دیگ بوت کہ ضلع ناروال ءِ لیہری ڈیم ءِ سیلاب ءَ چہ آماچیں دمگ ءَ چہ دمگی آبادی ءِ یلہ کنگ ءَ را دل یکیمی کنگ بوھگ ءَ اِنت، ءُ صوبہ خیبر پختونخوا ءِ آماچیں دمگ آنی تہ ءَ بجلی ءِ بحالی ءِ کار برجاہ اِنت۔ دیوان ءَ را گوشگ بوت کہ گلگت بلتستان ءَ راجی شاہراہ ءِ 2کلومیٹر ءِ بھر سیلاب ءِ سبب ءَ آپ ءِ چیر ءَ انت، ایشی ءِ بحالی ءِ کار جاری انت۔ دریائے ستلج ءَ گنڈا سنگھ والا، سلیمانکی دریائے راوی ءَ جسٹر ءُ دریائے چناب ءَ مرالہ ءِ ھند ءَ برزیں تک ءِ درجگ ءِ سیلاب اِنت، نالہ ڈیک ءَ ھم ترندیں سیلاپ ءِ جاور ھال اِنت، آیوکیں 12 ءَ بگر تاں 24 کلاک ءَ لاہور، گوجرانوالا ، گجرات ،راولپنڈی ڈویژنز، آزات جموں ءُ کشمیر ءِ ضلع ءَ سک باز ھور وھدیکہ گلگت بلتستان ءِ بازیں ھند آنی تہ ءَ ھور گمان اِنت۔ گند ءُ نند ءَ وفاقی وزیر منصوبہ بندی احسن اقبال، وفاقی وزیر موسمیاتی تبدیلی ڈاکٹر مصدق ملک، وفاقی وزیر مواصلات عبدالعلیم خان، وفاقی وزیر پاور ڈویژن سردار اویس احمد لغاری ، وفاقی وزیر اھوالکاری ءُ شنگ کاری عطاء اللہ تارڑ ، وفاقی وزیر نیک راہی کار سردار یوسف ، مزن وزیر ءِ مشیر ڈاکٹر توقیر شاہ ءُ حکومت ءِ ہمگرنچیں مزن مزنیں کارندہ آں بھر زوری کت۔