وزیرداخلہ محسن نقوی نا دورہ ءِ پارک روڈ سی ڈی اے ماڈل نرسری، چندی سیکشن تیا برجاشونداری کاریم تا معائنہ، ماسٹرپلان نا جاچ ءِ ہلک

اسلام آباد۔ 26 اگست (اے پی پی) بنجائی وزیر داخلہ محسن نقوی پارک روڈ آ واقع سی ڈی اے ماڈل نرسری نا دورہ ءِ کرے ہراڑے او چندی سیکشن تیا برجاشونداری کاریم تا معائنہ و ماسٹر پلان نا جاچ ءِ ہلک، اونرسری ٹی جوڑ کروک رین واٹر ہار وسٹنگ تالاب نا ہم مشاہدہ ءِ کرے۔ داوخت آ چیئرمین سی ڈی اے محمد علی رندھاوا وزیرداخلہ ءِ نرسری ٹی برجاشونداری کاریم تا بابت سرجمی اٹ حوال تس۔ ممبران سی ڈی اے، اے ڈی سی جی و ایلوتعلقدار کمامدارآک ہم ساڑی ئسر۔ حوال اٹی پاننگاکہ نرسری ٹی پوسکن ومنفرد طرز انا کنٹرولڈ وینٹی لیٹڈ گرین ہاؤسز تفنگانے ہرا نیال آتا نشوونماکن بے مٹ چاگڑد اس فراوان کیرہ، برجاسال داتم اسکان بشام سیزن اٹی 25 ہزار مفت نیال بشخنگانے وخت اس کہ باکو نا ہارٹیکلچر چاہندار آک ڈٹ اٹی کمک فراوان کننگءُ۔ محسن نقوی پارے کہ داڈٹ اسلام آباد نا شاری تا ہارٹیکلچر گرج آتے پورو کننگ اٹ مزل نا نشان مریک، نرسری ٹی فلاور شاپ و ٹریننگ انسٹیٹیوٹ اس ہم جوڑ کننگک وخت اس کہ سی ڈی اے ملازم آتے نیال آتا چیٹ اکن خصوصی تربیت فراوان کننگک ۔ وزیرداخلہ آذربائیجان نا ٹیم ءِ گچین کاریم کننگ آ شاباشی تس۔ یات سلے کہ بنجائی دارالحکومت نا چاگڑدی رکھ و سموگ تون مون تننگ کن 50 ایکڑ آتالان پاکستان نا غٹ آن بھلا ماڈل نرسری اس جوڑ کننگ نا فیصلہ کننگانے ہراپوروی نا خڑک ءِ۔ نرسری ٹی 10 لکھ نیال خلنگک وخت اس کہ اودے پوسکن آخواست آتا رداٹ تفنگ انگ ءِ۔