صوبہ نا الس زوت بینک آف بلوچستان نا بابت خوشخبری اس بِنک، وزیراعلیٰ بلوچستان

کوئٹہ۔ 26 اگست (اے پی پی) وزیراعلیٰ بلوچستان میر سرفراز بگٹی پارینے کہ بلوچستان نا الس زوت بینک آف بلوچستان نا بابت خوشخبری اس بِنک، بینک انا جوڑ کننگ نا بابت بنائی فزیبیلیٹی رپورٹ عمل نا قابل ءِ۔ داخیال آتا درشانی ءِ او تینا کماشی ٹی دیوان آن تران کرساکرے۔ دیوان اٹی بینک آف بلوچستان نا جوڑ کننگ نا ڈٹ ءِ زوت فعال کننگ آ امنا کننگا۔ کمامدارآتا کنڈآن بینک آف بلوچستان نا جوڑ کننگ نا بابت بنائی فزیبیلیٹی رپورٹ پیش کننگا۔ وزیراعلیٰ بلوچستان ڈٹ ءِ عمل نا قابل گوندسا اسہ ہفتہ ٹی آپریشنل پلان اس مرتب کننگ ناپارت کرے۔ میر سرفرازبگٹی پارے کہ بینک آف بلوچستان نا کمک اٹ صوبہ ٹی زرگزرانی سرجزآتے مون آدننگ ملک، بینک آف بلوچستان نا جوڑ کننگ آن الس، پوریاگر و زرکارآتے آب اٹ بنکنگ آسراتی ملک، بلوچستان نا الس زوت خوشخبری اس بِنک، بینک آف بلوچستان نا کمک اٹ صوبہ ٹی زرگزرانی سرجزآتے مون آدننگ ملک، صوبہ نا ورناتے روزگار نا وارخواہی ہم فراوان مریک، بینک آف بلوچستان صوبہ نا زرگزران اٹی تاریخی مزل اس مریک، بینک صوبائی وسیلہ غاتے کاریم اٹ اتسا شونداری ڈٹ آتا رفتار ءِ ترند کیک۔ دیوان اٹی صوبائی وزیر خزانہ میر شعیب نوشیروانی ، چیف سیکرٹری بلوچستان شکیل قادر خان، پرنسپل سیکرٹری بابرخان آن بیدس بینکنگ سیکٹر نا چاہندار آک آن لائن بشخ ہلکر۔