حکومت و غٹ تعلقدار ادارہ غاک زرگزرانی شونداری و شونہالی و واپار و زرکاری ٹی گچینی کن سنبرینگوک ءُ، وزیراعظم محمد شہباز شریف

اسلام آباد۔ 26 اگست (اے پی پی) وزیراعظم محمد شہباز شریف پارینے کہ حکومت و غٹ تعلقدار ادارہ غاک زرگزرانی شونداری و شونہالی و واپار و زرکاری ٹی گچینی کن سنبرینگوک ءُ، کسٹم نا جاچ پڑتال و کساس نا نظام ءِ پوسکن ٹیکنالوجی تون ہم گرنچ و فیس لیس کرسا شفافیت ءِ پک کننگے۔ سے شنبے نادے آ وزیراعظم آفس نا میڈیا ونگ آن جاری بیان نا رداٹ او داخیال آتا درشانی ءِ کسٹم نا جاچ پڑتال و کساس نا نظام ءِ شفاف کننگ کن کروک آ گام گیج آتا بابت جاچ دیوان نا کماشی ءِ کرساکرے۔ دیوان اٹی بنجائی وزیر خزانہ محمد اورنگزیب، بنجائی وزیر چاگڑدی بدلی ڈاکٹر مصدق ملک، بنجائی وزیر حوالکاری و شینکاری عطاء اللہ تارڑ، بنجائی وزیر اقتصادی امور ڈویژن احدخان چیمہ، وزیر مملکت خزانہ بلال اظہرکیانی و ایلوتعلقدار سرکاری کمامدار آک بشخ ہلکر۔ وزیراعظم کسٹم کمامدار و غٹ تعلقدار ادارہ غاتے اصلاحات نا زوت، پورو و گچین نفاذ کن المی پارت جاری کرے۔ وزیراعظم کسٹم نظام اٹی شفافیت، خراج کلیکشن اٹی ودکی و کاروباری خواجہ غاتے آسراتی کون آ اہم پلو آتیکن غٹ المی گام گیج کننگ نا پارت کرے۔ دیوان اٹی وزیراعظم ءِ کسٹم نا جاچ پڑتال و کساس اٹی کروک آ داتم اسکان نا گام گیج آتیان معلومدار کننگا وپاننگاکہ مصنوعی ذہانت آ تالان رسک مینجمنٹ سسٹم ءِ ہم زوت فعال کننگک۔ دیوان ءِ پاننگاکہ کسٹم نا سکینرآتا کمک اٹ جاچ پڑتال اٹی مصنوعی ذہانت نا کاریم اٹ اتنگ آن کسٹم کلیئرنس اٹی درکار وخت کم آن کم مرسا کننگ ءِ، حکومت نا اسمگلنگ نا برخلاف گچین کارروائی تیان گڑاتا غیرکانودی ترسیل اٹی کمتی و گڑاتا باقاعدہ کانودی نظام نا رداٹ کسٹم کلیئرنس نا کچ اٹی ودکی مسنے، کسٹم اٹی جاچ پڑتال و کساس نا نظام ءِ فیس لیس کننگ کن غٹ المی گام گیج آتیا کاریم برجاءِ۔ وزیراعظم پارے کہ کسٹم نا نظام نا گچینی و جدت نا مسخت برآمد و درآمد آتون گنڈوک کاروباری خواجہ غاتے آسراتی بہم سرکننگ تون ملکی ریونیو ٹی ودکی کننگ ءِ، کسٹم جاچ پڑتال و کساس کن انتظامی کارروائی تیٹی درکار وخت ءِ کم آن کم کننگے، کسٹم نظام نا اصلاحات نا گچین نفاذ کن غٹ تعلقدار ادارہ غاک تین پہ تینی ہم گرنچی و مربوط حکمت عملی نا رداٹ کاریم کیر۔ وزیراعظم پارے کہ زرگزرانی و واپاری اصلاحات نا کمک اٹ کاروبار و زرکاری ٹی ودکی کننگ حکومت نا اولیت آتیٹی اوار ءِ، کسٹم نظام نا اصلاحات اٹی جہانی کہول آ کروک آ قابل عمل و گچین حکمت عملی اٹ ہرممکن فائدہ دوئی کننگے، ملکی زرگزرانی شونداری و شونہالی و واپار و زرکاری ٹی گچینی نا مزل نا دوئی کننگ کن حکومت و غٹ تعلقدار ادارہ غاک سنبرینگوک ءُ۔ وزیراعظم پارت کرے کہ کسٹم کساس آ کاروباری خواجہ غاتا کنڈآن کروک آ نظرثانی اپیل ءِ بِننگ نااختیار بے کنڈ ہلوک آفیسر آتا حوالہ کننگے، بندرگاہ تیا ودوک آ کارگو و اونا زوت آن زوت فراوانی کن ہندن ءُ منظم ڈٹ بندی اس کننگے تانکہ گڑاک زوت آن زوت بندرگاہ غان تینا مزل نا کنڈآ رواں دواں مریر، کسٹم کساس آ نظرثانی اپیل نا نظام ءِ شفاف جوڑ کننگ کن دمدستی وڑاٹ المی گام گیج کننگے۔