سینیٹر شیری رحمان نا اسرائیل نا کنڈآن خان یونس اٹی پین شش صحافی تا خون نا ترندانگا لوز آتیٹی مذمت

اسلام آباد۔ 26 اگست (اے پی پی) پاکستان پیپلزپارٹی نا نائب صدر سینیٹر شیری رحمان اسرائیل نا کنڈآن خان یونس اٹی پین شش صحافی تا بہیمانہ خون نا ترند انگا لوز آتیٹی مذمت ءِ کرساپارینے کہ غزہ ٹی شش صحافی تا بے دڑدی اٹ خون اسرائیل نا صحافت دشمنی و سچ ءِ توننگ نا بدنیتی نا ناقابل تردید شاہدی ءِ، جہانی برادری انسانی المیہ ءِ توننگ کن دا ظالمانہ و بے رحمانہ کشت وخون نا برخلاف دمدستی، گچین و عملی گام گیج کے۔ سے شنبے نادے آ پی پی پی میڈیا سیل آن جاری بیان نا رداٹ شیری رحمان پارے کہ اسرائیل نا سفاکانہ و غیرانسانی پالیسی شش پین صحافی تے مدامی کن چُپ کرینے ہرا صحافت و آجوئی درشانی آ پاش آن پاش جلہو اسے، صحافی تا خون نئے بیرہ اسہ وحشیانہ ڈوہ بلکن جہانی کانود نا رداٹ اسہ بھلو جنگی ڈوہ اسے، اسرائیل دنیا نامون آ پاش آن پاش دہشت گردی و ظلم و بربریت نا درشانی ءِ کننگ ءِ۔ اوپارے کہ غزہ ٹی شش صحافی تا بےدڑدی اٹ خون اسرائیل نا صحافت دشمنی و سچ ءِ توننگ نابدنیتی ناناقابل تردید شاہدی ءِ، ہسپتال، چنا، زالبول و صحافی اسرائیل نا ہرہدف انسانیت نا دنگ آن ایڑتر ءِ، اونا ہر گام انسانیت نا خلاف ورزی و اخلاقی پستی نا بدترین درور ءِ، النصر ہسپتال آ بمباری اسرائیل نا انسانیت سوزی و جہانی کانود نا آجوخلاف ورزی نا شاہدی ءِ، ہرادنیا نا ضمیر ءِ سُرفنگ کن گنج اسے۔ شیری رحمان پارے کہ صحافی تا دتراٹ رنگی دوتے اٹ دزگیر اسرائیل تینے جمہوریت و آجوئی نا علمبردار گوندنگ نا ہچ ءُ حق اس تخپک، غزہ ٹی انتس کہ مننگ ءِ،او جنگ اس اف بلکن اسہ نسل کشی، انسانی حق انا لتاڑو سچ انا برخلاف اعلان ءِ جنگ ءِ۔ شیری رحمان پارے کہ جہانی برادری نا زمواری ءِ کہ او دا ظالمانہ و بے رحمانہ کشت وخون نا برخلاف دمدستی گچین و عملی گام گیج کے تانکہ دا انسانی المیہ ءِ توننگ مرے۔