دریائے ستلج نا وہینگ اٹی ودکی و گمانی نوکاپی حالیت آتا رداٹ بھلو کچ اسے آ کشنگ نا کارروائی تا بناء

اسلام آباد۔ 26 اگست (اے پی پی) این ڈی ایم اے دریائے ستلج نا وہینگ اٹی ودکی و گمانی نوکاپی حالیت آتا بابت پی ڈی ایم اے پنجاب ءِ پیشگی الرٹ جاری کرے ، این ڈی ایم اے نا کنڈآن پیشگی الرٹ آ پی ڈی ایم اے پنجاب ستلج نا خڑکی علاقہ غاتیٹی بھلو کچ اسے آ کشنگ نا کارروائی تا بناءِ کرے۔ سے شنبے نادے آ این ڈی ایم اے نا میڈیا ونگ آن جاری بیان نا رداٹ این ڈی ایم اے نا کنڈآن جاری پیشگی آگاہی و الرٹ اٹی داتم اسکان کم و ود یک و نیم لکھ بندغ نوکاپ نا خطرہ غاتا گواچی علاقہ غاتیان رکھوک ہند آتیا منتقل مسنو، داتم اسکان قصور آن 14 ہزار 140 بندغ، وخت اس کہ اوکاڑہ غان 2 ہزار 63 بندغ ءِ خطرہ غان دوچار علاقہ غاتیا ن گدریفنگانے، بہاولنگر آن 89 ہزار 868 وخت اس کہ بہاولپور آن 361 بندغ ءِ داتم اسکان حساس علاقہ غاتیا گدریفنگانے، وہاڑی آن 165 پاکپتن 873 بندغ آتے رکھوک ہند آتیا گدریفنگانے، این ڈی ایم اے نا کنڈآن الرٹ جاری مننگ آ کم و ود 40 ہزار بندغ مہالو آن رکھوک ہند آتیا منتقل مسنو۔ این ڈی ایم اے تعلقدار ادارہ و ایمرجنسی سروسز ءِ ہائی الرٹ مننگ نا پارت جاری کرینے۔ این ڈی ایم اے شاری تے دریا، نالہ و شیفکو علاقہ غاتیان مرمننگ و بے گرج سفر آن پاناد کننگ نا پارت کرینے، داہم پاننگانے کہ الس ٹی وی، ریڈیو، موبائل الرٹ و پاک این ڈی ایم اے ڈیزاسٹر الرٹ ایپ انا کمک اٹ جاری کروک الرٹ وپارت آتیا عمل کیر۔