اوآئی سی نا غزہ ٹی دمدستی جنگ بندی و اسرائیلی جارحیت ءِ بند کننگ نا خواست

جدہ۔ 26 اگست (اے پی پی) اسلامی کمکار تنظیم (اوآئی سی) نا سیکرٹری جنرل حسین ابراہیم طحہٰ غزہ ٹی دمدستی و آخبتی جنگ بندی ، جارحیت نا چٹفنگ و اسرائیلی فورس آتا پورو کشنگ آ زور شاغانے۔ جدہ ٹی اوآئی سی وزراء خارجہ کونسل نا 21 می اہم دیوان آن تران کرسا اوغزہ ٹی نسل کشی، جبری ہمپ وبٹ، سجفوک بھسکاری و غیرکانودی ناکہ بندی نا مذمت ءِ کرے۔ اواسرائیل آ دوبہ خلک کہ او بین ءِ جنگی سلہہ نا وڑاٹ کاریم اٹ اتنگ ءِ۔ اوخاص کر مقبوضہ بیت المقدس نا ای ون ایریاٹی اسرائیلی بستی تا ودفنگ و صحافی تے شست کننگ نا ہم مذمت ءِ کرے و پارے کہ داوڑنا گام گیج آتا برخلاف جہانی کانود نا رداٹ کانودی کارروائی المی ءِ۔ اوفلسطینی الس نا برخلاف برجااسرائیل نا ’وحشیانہ جنگی ڈوہ‘ آ زیات گچین جہانی ردعمل آ زور شاغا۔ اوخبڑدار کرے کہ اسرائیلی حکومت نا غزہ غا پورو فوجی کنٹرول و گریٹر اسرائیل ورژن ءِ مون آدننگ نا ارادہ جہانی کانود نا اسُل خلاف ورزی ءِ ۔ وزراء خارجہ کونسل نا دیوان اٹی غزہ ٹی ودوک آ انسانی تنکی آہم سجفنگا۔ اوآئی سی نا سیکرٹری جنرل باسک مک آتیا زور شاغاکہ او ریاض اٹی اڈ ہلوک عرب اسلامی سروکی دیوان اٹی منظور کروک آ قرارداد آتیا عملدرآمد کیر ۔ اوفلسطینی ریاست ءِ امنا کروک آ ملک آتا ودوک آ کچ انا ستاءِ کرے و ایلو ملک آتیان ہم داوڑ کننگ نا خواست کرے۔