پاکستان ءُ مراکش ءِ پارلیمانی دوستی گل ءِ گند ءُ نند ءَ دو نیمگی کمک ءَ را گیش مھکم کنگ ءِ سر ءَ تپاک

اسلام آباد۔25اگست (اے پی پی): پاکستان ءُ مراکش ءِ پارلیمانی دوستی گروپ ءِ دیوان پارلیمنٹ گس ءِ کنوینر سینیٹر بلال احمد خان ءِ سروکی ءَ برجم دارگ بوت۔ گند ءُ نند ءَ مراکش ءِ سفیر محمد کرمون ءَ ھوار سینیٹر فیصل سلیم رحمان، میر دوستین خان ڈومکی ، عمر فاروق ءُ پارلیمانی گروپ ءِ چیئرمین سینیٹ ءِ مشیر مصباح کھر ءَ شریک بوتگ انت۔ گند ءُ نند ءِ تہ ءَ دوئیں ملک آنی نیام ءَ پارلیمانی، اقتصادی ءُ سفارتی سیادی آناں گیش پراھی کنگ ءِ سر ءَ دلگوشی دیگ بیت۔ شریکیں مردماں وانگ ءُ زانگ، جان سلامتی، تجارت ءُ کشت ءُ کشاری ءِ پڑ ءَ کمک ءَ را گیش کنگ ءِ واستہ سک باز دلگوشی ءِ درشانی کت۔ وتی بنداتی گشتانک ءِ تہ ءَ سینیٹر بلال احمد خان ءَ گوشت کہ باقاعدہ پارلیمانی تبادلہ ءَ چہ دیریں کمک ءُ مردم آنی نیام ءَ رابطہ آناں دیمروئی رسیت۔ اسمبلی ءِ چیئرمین واجہ مصباح خار ءَ ادارگی کمک ءِ ضلورت ءِ سر ءَ زور پر دات ءُ گوشت کہ تجارت، بنیاتی ڈھانچہ ءُ دود ءُ ربیدگ ءِ تبادلہ ءَ چہ دراجیں مدت ءِ بنیات ءَ دو نیمگی شریکداری ءَ را مھکم کنگ بوت کنت۔ مراکش ءِ سفیر محمد کرمون ءَ پاکستان ءِ گوما سیادی ءَ را گیش ودینگ ءِ واستہ وتی جزم ءِ پدا زور دات۔ آئی ءَ پاکستان ءَ چہ درآمدات ءِ تہ ءَ گیشی ءِ ضلورت ءِ سر ءَ زور پر دات ءُ گوشت کہ پاکستانی شہری آنی واستہ ای ویزہ ءِ آسراتی پجاری کنگ بوتگ پمیشکا پاکستان مراکش ءِ شہری آنی واستہ ھم ویزہ ءِ آسراتی ءَ بہ کنت۔ آئی ءَ مزن تک ءِ تر ءُ تاب ءِ دعوت ھم داتگ۔ سینئر فاسیلات سلمی رحمان ءَ وانگ ءُ زانگ، طبی سامان، سیل ءُ سواد، جان سلامتی ءُ دفاعی تربیت ءِ شوبگ آناں آیوکیں کمک ءِ ھاترا بوت کنوکیں شوبگ لیک اِتگ ءُ گوشت کہ پاکستان ءُ مراکش ءِ نیام ءَ وت مہ وتی ءِ دیمروئی ءِ واستہ یک باقاعدہ معاہدے ءِ سر ءَ دستخط کنگ بہ بیت۔ آئی ءَ سوج داتگ کہ پاکستانی نودربر آناں صوبائی بنیاد ءَ اسکالرشپ پجاری کنگ بہ بیت۔ گند ءُ نند ءِ گڈ ءَ دوئیں نیمگاں پارلیمانی سفارتکاری ءُ ادارگی کمک ءِ وسیلگ ءَ پاک مراکش ءِ سیادی ءَ را گیش گہتر کنگ ءِ وتی جزم ءِ پدا زور دات۔ اراکنا ءَ گوشت کہ دوئیں ملک آنی اُلس ءَ را نزیک کنگ ءُ دو نیمگی سیادی ءَ را گیش مھکم کنگ ءِ تہ ءَ برجاھیں گپ ءُ تران، یک شلیں روگ ءُ آیگ ءُ عملی گامگیج بنیاتی سنگ ثابت بنت۔