ورناتا تخلیقی لائخی، ہمت و ذہانت ءِ پاکستان نا روشنا آخبت نا جوڑ کننگ اٹ خلنگ اُن، بنجائی وزیر احسن اقبال نا ’’پاکستان ون‘‘ پروجیکٹ نا بنائی دود آن تران

اسلام آباد۔ 25 اگست (اے پی پی) بنجائی وزیر ڈٹ بندی، شونداری و خصوصی گام گیج پروفیسر احسن اقبال پارینے کہ ورناتا تخلیقی لائخی، ہمت و ذہانت ءِ پاکستان نا روشنا آخبت نا جوڑ کننگ آ خلنگ اُن، پاکستان نا سٹریٹجک محل و وقوع علاقائی واپار نا بابت بے مٹ گمان آتا حامل ءِ، سویلی ایشیاء، نیامی ایشیا ودے ٹک نیامی ءِ گنڈنگ اٹی پاکستان اہم کڑد ادا کننگ کیک۔ اوداہیت ءِ دوشنبے نادے آ داڑے ’’پاکستان ون‘‘ پروجیکٹ نا بنائی دود آن تران کرساپارے۔ بنجائی وزیر پارے کہ پروجیکٹ’’پاکستان ون‘‘ نا مسخت ورناتا لائخی تے عملی جدت و شونداری ٹی شاغنگ ءِ۔ اوپارے کہ بزنس پلان نا قومی مقابلہ اٹ ورناتیٹی خود روزگاری ءِ مون آدننگ رسینگک، ہرصوبہ، ہرعلاقہ، خلقی و شار انا تپہ ءِ ’’پاکستان ون‘‘ اٹی اوار کننگک۔ اوپارے کہ حکومت ہندن ءُ پاکستان اس جوڑ کننگ خواہک ہرا شونداری، جدت و جہانی پت انا پہچان مرے۔ ورناتا تخلیقی لائخی، ہمت و ذہانت ءِ پاکستان نا روشنا آخبت نا جوڑ کننگ اٹ خلنگ اُن۔ ننے نوکری پٹوک آ زرگزران آن پیش تمسا نوکری ودی کروک آ زرگزران جوڑ مروئی ءِ۔ بنجائی وزیرپارے کہ ہراملک آک شونداری و شونہالی نا مزل ءِ دوئی کرینو۔ اوصنعت کاری، جدت و ٹیکنالوجی ءِ تیناکریر۔ اوپارے کہ پاکستان نا برآمدآک 27 آن 32 ارب ڈالر نا نیام اٹ محدود ءُ ہرافتے ٹی بیرہ ٹیکسٹائل نا بشخ 17.9 ارب ڈالر ءُ۔ پاکستان نا آئی ٹی و سافٹ ویئر خذمت 15 آن 20 درسد سالانہ ودنگ ءُ، آئی ٹی برآمدات آک 2030ء اسکان 20 ارب ڈالر آن گدرینگ انگ کیرہ، ہندا وڑ ایگری ٹیک و فوڈ پروسیسنگ ویلیو ایڈڈ مصنوعات برآمد آتا ذریعہ جوڑ مننگ کیک۔ قابل تجدید توانائی نا اہمیت ءِ تالان کرسا اوپارے کہ قابل تجدید توانائی پاکستان ءِ چاگڑد دوست جہانی منڈی تیٹی جاگہ ترفنگ کیک ، پائیدار مینو فیکچرنگ ڈیہہ اٹی پاکستان کن پوسکن ءُ وارخواہی اس ودی کیک۔ اوپارے کہ پاکستان نا سٹریٹجک محل و وقوع علاقائی واپار نا بے مٹ گمان فراوان کننگ ءِ، سویلی ایشیا، نیامی ایشیاء و دے ٹک نیامی ءِ گنڈنگ اٹ پاکستان اہم کڑد ادا کننگ کیک۔ اوپارے کہ ای پاکستان نا کمک اٹ فن ٹیک، ایگری ٹیک و گرین ٹیک اتی پوسکن آ نظام اس ٹہیفنگ انگ ءِ ، ڈیجیٹل کسب و جدت اٹی زرکاری آن ننا ورناآبادی زرگزران اٹ شونداری نا انجن جوڑ مریک۔