بنجائی وزیر داخلہ محسن نقوی تون ایرانی ہم منصب سکندر مومنی نا ٹیل فون آ رابطہ، پاکستان اٹی پِر ونوکاپ آن جونی نسخان تیا است ہسونی نا درشان

اسلام آباد۔ 25 اگست (اے پی پی) بنجائی وزیر داخلہ محسن نقوی تون ایرانی ہم منصب سکندر مومنی ٹیلفون آ رابطہ کرے۔ ایرانی وزیر داخلہ پاکستان خاص کر خیبرپختونخوا، گلگت اٹی طوفانی پِر و نوکاپ آن نہادی انسانی جون تا زیان آ ڈکھیائی و ہڑزخواہی نا درشانی ءِ کرے و زوال کروک آ بندغ آتا خاہوت آتون ہمدردی نا درشانی ءِ کرے و صبر وجمیل نا دعاکرے۔ ایرانی وزیرداخلہ پاکستانی ہم منصب محسن نقوی ءِ نوکاپ آن زہمی تا کمک کن کمکاری نا سلہ خلک۔ ایرانی وزیرداخلہ پارے کہ پاکستان ننا ایلم ہمسایہ ملک ءِ، آزمائشت اٹی ہروڑنا کمک کن تیار اُن۔ پاکستان اٹ نوکاپ نا بھسکاری تے خنسا بھاز است ہسونی مسنے۔ نن پاکستان نا الس تون ہم کوپہ سلوک اُن۔ وزیرداخلہ محسن نقوی نوکاپ آن زہمی تیکن کمک نا سلہ و یکجہتی نا درشانی آ ایرانی ہم منصب نا منت واری ءِ ہرفے۔ وزیرداخلہ محسن نقوی پارے کہ ایران و پاکستان نا خوشی و غم اسہ ایلوناءُ۔ موسمیاتی بدلی پاکستان اٹی بھسکاری نا پیش خیمہ جوڑ مننگ ءِ۔ تاریخ اٹی اولیکو وار پاکستان دا خطرناک موسمیاتی حالیت آتیان گدرینگ انگ ءِ۔ غٹ ادارہ غاک نوکاپ آن زہمی تا کمک کن فیلڈ اٹی ءُ و زہمی تا بحالی و ریلیف اولیت ءِ۔