وزیراعظم نا پارت آ غزہ کن 100 ٹن کمکی گڑاتیا تالان 21 می کھیپ بذریعہ خصوصی جہاز روانہ

اسلام آباد۔ 25 اگست (اے پی پی) وزیراعظم محمد شہباز شریف نا خصوصی پارت آ غزہ کن علامہ اقبال انٹرنیشنل ایئرپورٹ لاہور آن 100 ٹن کمکی گڑاتیا تالان جم وڑاٹ 21 می کھیپ بذریعہ خصوصی جہاز روانہ کننگانے، کمکی گڑاتیٹی راشن بیگ، تیار کن و خور و ڈبہ بند فروٹ اوار ءُ۔ دوشنبے نادے آ این ڈی ایم اے آن جاری بیان نا رداٹ وزیراعظم محمد شہباز شریف نا خصوصی پارت آ پاکستان نا کنڈآن غزہ کن پین کمکی گڑا روانہ کننگ انگ ءِ۔ غزہ کن کمکی گڑاتا فراوانی نا ساڑی آ چرجوئی ٹی پین 412 ٹن کمکی گڑا پنچ جہاز آتا کمک اٹ روانہ کننگانے۔ علامہ اقبال انٹرنیشنل ایئرپورٹ لاہور آن 100 ٹن کمکی گڑاتیا تالان جم وڑاٹ 21 می کھیپ بذریعہ خصوصی جہاز روانہ کننگانے، 21 می کھیپ اٹی 100 ٹن کمکی گڑابشمول راشن بیگ، تیار کن وخور و ڈبہ بند فروٹ اوار ءُ۔ داتم اسکان 21 کمکی کھیپ آتا کمک اٹ مون تروک آ امداد نا جم وزن 2027 ٹن ءِ۔ داکان مست 23 اگست آ 100 ٹن کمکی گڑاتیا تالان 19 می کھیپ لاہوروخت اس کہ چارمیکو کھیپ 12 ٹن گڑاتتون اسلام آباد آن روانہ کننگانے ۔ گڑاتا روانگی نا دود اٹی بنجائی وزیر سمندر پار پاکستانیز و انسانی شونداری چوہدری سالک حسین بطور مہمان خاص بشخ ہلک۔ دود اٹی حکومتی نمائندہ و این ڈی ایم اے نا بڑزکو آفیسر آک ہم ساڑی ئسر۔ بنجائی وزیر گڑاتا دمدستی روانگی ءِ پک کننگ آ این ڈی ایم اے و ایلو آسودہی ادارہ غاتا کوشست آتا ستاءِ کرے و اوفتا منت واری ءِ ہرفے۔ اوداعزم انا درشانی ءِ کرے کہ پاکستان دا مشکل وخت اٹی فلسطین نا الس تون سلوک ءِ و اوفتا گرج آتے پورو کننگ نا ہرممکن کوشست کیک۔