وفاقی وزیر تجارت جام کمال خان ءَ ڈھاکہ ءَ اسکوائر فارماسیوٹیکلز ءِ تر ءُ تاب

ڈھاکا۔24اگست  (اے پی پی): وفاقی وزیر برائے تجارت جام کمال خان ءَ گوشت کہ پاکستان ءُ بنگلہ دیش ءِ دوائی آنی صنعت زانت ءِ بدلی ءُ وت مہ وتی کمک ءِ وسیلگ ءَ گیش دیمروئی کت کن اَنت۔ دوئیں ملک نہ ایوک ءَ یکجائی منصوبگ ءُ پالیسی کمک ءِ وسیلگ ءَ دو نیمگی تجارت ءَ را دیم ءَ برگ ءَ انت بلکیں دمگی ءُ جھان ءِ مارکیٹ آنی جان سلامتی ءِ ضلورت آناں جوانیں رنگ ءَ پیلو کنگ ءَ انت۔ یک شمبے ءِ روچ ءَ وزارت تجارت ءِ نیمگ ءَ جاڑی بوتگیں بیان ءِ رد ءَ وفاقی وزیر ءَ ڈھاکہ ءَ اسکوائر فارماسیوٹیکلز پی ایل سی ءِ تر ءُ تاب ءِ ساھت ءَ اے ھیالانی درشانی کتگ۔ وفاقی وزیر جام کمال خان ءَ کمپنی ءِ منیجنگ ڈائریکٹر ءُ سینئر مینجمنٹ ءَ گوں گند ءُ نند کت۔ اے موہ ءِ سر ءَ وفاقی وزیر جام کمال خان ءَ را بنگلہ دیش ءِ دوا سازی ءِ صنعت ءِ سفر ءُ ھما پالیشی آنی بابت ءَ سرجمیں بریفنگ دیگ بوت کہ ایشی ءَ چہ اے دیمروئی ممکن بوتگ۔ جام کمال خان ءَ ادارگ ءِ آسراتی آنی تر ءُ تاب ھم کتگ ءُ پیداوار ءِ عمل ءِ سر ءَ ھم چار ءُ تپاسی کتگ۔ وفاقی وزیر ءِ گوما پاکستان ءِ وزارت تجارت ءِ کارندہ ھم ساڑی اتنت۔ تر ءُ تاب ءِ ساھت ءَ بنگلہ دیش ءُ پاکستان ءِ نیام ءَ تجارتی روانی ءَ را گیش آسان کنگ ءِ واستہ جتا جتائیں تجویز آنی سر ءَ ھم چار ءُ تپاسی کنگ بوت۔ جام کمال خان ءَ اے موہ ءِ سر ءَ گوشت کہ زانشت ءِ بدلی ءُ وت مہ وتی کمک ءِ وسیلگ ءَ پاکستان ءُ بنگلہ دیش ءِ دوائی ءِ صنعت گیش دیمروئی کت کن اَنت۔ آئی ءَ اے گپ ءِ سر ءَ زور پر دات کہ دوئیں ملک آنی تہ ءَ یکجائی منصوبگ ءُ پالیسی کمک ءَ چہ نہ ایوک ءَ دو نیمگی تجارت ءَ را دیمروئی رس ایت بلکینگ ءَ دمگی ءُ جھان ءِ مارکیٹ آنی جان سلامتی ءِ ضلورت آناں جوانیں رنگ ءَ پیلو کنگ بیت۔ زانگ بہ بیت کہ وفاقی وزیر ءِ اسکوائر فارماسیوٹیکلز ءِ اے تر ءُ تاب پاکستان ءُ بنگلہ دیش ءِ نیام ءَ صنعتی ءُ تجارتی کمک ءَ را نوکیں رنگ ءُ دروشم دیگ ءِ کوشست آنی بھر انت۔