وفاقی وزیر تجارت جام کمال خان ءَ بنگلہ دیش ءِ تجارت ءِ مشیر ایس کے بشیر الدین ءِ گوما چٹاگانگ ءِ تر ءُ تاب کتگ، کاروباری برادری ءَ گوں گند ءُ نند

چٹاگانگ ۔23اگست (اے پی پی): پاکستان ءِ وفاقی وزیر تجارت جام کمال خان ءُ بنگلہ دیش ءِ تجارت ءِ مشیر ایس کے بشیر الدین یک روچی سرکاری تر ءُ تاب ءِ سر ءَ چٹاگانگ ءَ سر بوتگ اَنت، اودا ضلعی انتظامیہ ءُ شاہ امانت ءِ میاں اوستمانی بالی پٹ ءِ کارندہ آنی نیمگ ءَ آھاں وش آتک کنگ بوتگ۔ تر ءُ تاب ءِ ساھت ءَ ڈل ءَ چٹاگانگ چیمبر آف کامرس اینڈ انڈسٹری ءَ گوں گند ءُ نند کتگ، بنگلہ دیش ءِ جہاز ءِ ٹکر کنگ ءِ صنعت ءُ چٹاگانگ بندرگاہ ءِ چار ءُ تپاسی کتگ۔ اے موہ ءِ سر ءَ کاروباری برات آنی گوما دیم پہ دیم گپ ءُ تران کنگ بوت، تجارتی کمک ءِ نوکیں آسر آنی سر ءَ گپ ءُ تران کنگ بوت ءُ پاکستان ءُ بنگلہ دیش ءِ نیام ءَ رسد ءِ آسراتی آناں دیمروئی دیگ ءِ سر ءَ ھم چار ءُ تپاسی کنگ بوت۔ کاروباری براتی ءَ پاک بنگلہ دیش ءِ تجارتی سیادی ءِ ھوالگ ءَ ارزشتی ایں ھیال ءُ لیکہ داتگ ءُ دوئیں ملک آنی نیام ءَ براہ راست بالی گراب آنی بندات کنگ، فری شپنگ سروس ءُ تجارت ءِ ڈیجیٹلائزیشن ءِ ھوالگ ءَ سوج داتگ۔ وفاقی وزیر ءُ بنگلہ دیش ءِ مشیر ءَ اے موہ ءِ سر ءَ گوشت کہ پاکستان ءُ بنگلہ دیش ءِ نیام ءَ زوت ’’تجارت ءِ ھوالگ ءَ یکجائی کارگس‘‘ جوڑ کنگ بوھگ ءَ اِنت، ایشی ءَ چہ تجارتی گپ ءُ تران ءِ واستہ ادارگی فریم ورک ءِ پجارینگ بیت۔ ایشی ءَ ابید تیاریں پوشاک، کشت ءُ کشاری ءِ شوبگ، جان سلامتی، چمڑہ ءُ المی سامان آنی تہ ءَ کمک ءِ موہ آنی سر ءَ ھم گپ ءُ تران کنگ بوت۔ دوئیں رہشون آں اے گپ ءِ سر ءَ تپاک کت کہ پاکستان ءُ بنگلہ دیش ءِ نیام ءَ بیپار ءُ سرمایہ کاری ءِ واستہ مزنیں گنجائش است انت۔ آئی ءَ کاروباری براتی ءَ را 25 ءَ بگر داں 27 نومبر 2025ءَ کراچی ءَ برجم دارگ بوھوکیں ’’سیمی میاں اوستمانی وردن ءُ وراک ءُ کشت ءُ کشاری نمائش‘‘ ءَ بہر زورگ ءِ دعوت دات۔ایشی ءَ ابید افریقہ ءُ میاں اوستمانی ایشیا ءَ یکجائی برآمدات ءِ آسراتی آنی سر ءَ ھم ھیال ءُ لیکہ کنگ بوت ءُ پاک بنگلہ دیش ٹریڈ اینڈ انویسٹ ءِ جوڑ کنگ ءِ سر ءَ گپ ءُ تران کنگ بوت۔ جام کمال خان ءُ ایس کے بشیر الدین ءَ کبیر جہاز ری سائیکلنگ آسراتی آنی ھم تر ءُ تاب کت، ایشی ءِ تہ ءَ آھاں جہاز سازی، جہاز ءِ ٹُکّگ ءُ ری سائیکلنگ ءِ پڑ ءَ دوئیں ملک آنی نیام ءَ کمک ءِ دائرہ کار ءِ بابت ءَ سرپدی دیگ بوت۔ چٹاگانگ بندرگاہ اتھارٹی ءِ چیئرمین ءَ بندرگاہ ءِ راجدپتر، کارروائی، جاری منصوبگ ءُ تجارت ءِ ڈیجیٹلائزیشن ءِ ھوالگ ءَ ’’یک ونڈو آپریشن‘‘ ءَ ھوار تفصیل آنی بابت ءَ ڈل ءَ را سرپدی دات۔