ایشیائی شونداری بینک بلوچستان اٹی ریکوڈک نا پروگولڈمائن ڈٹ اکن مالیاتی پیکج نا منظوری ءِ تس

اسلام آباد۔ 22 اگست (اے پی پی) ایشیائی شونداری بینک بلوچستان اٹی ریکوڈک نا پروگولڈمائن ڈٹ اکن مالیاتی پیکج نا منظوری ءِ تس ، داٹی 300 ملین ڈالرنا بنائی وام و بلوچستان حکومت نا بشخ انا زرکاری ءِ پک کننگ کن 110 ملین ڈالر نا جزوی کریڈٹ گارنٹی اوار ءِ، ڈٹ نئے بیرہ پاکستان نا زرگزران کن اہم ءُ مزل بلکن مچ آ دنیا ٹی اہم معدنیات نا ودوک آ طلب ءِ پورو کننگ اٹی ہم کمکار مریک۔ اے ڈی بی نا جمعہ نادے آ جاری پریس ریلیز نا رداٹ بینک انا صدر مساتو کانداپارے کہ ریکوڈک ڈٹ آن نئے بیرہ جہانی کہول آ اہم معدنیات نا سپلائی چین بلکن چاگڑد دوست توانائی نا کنڈآ منتقلی و ڈیجیٹل جدت ءِ مون آ دننگ اٹی ہم کمک رسینگک، دا ڈٹ پاکستان کن ہم گیم چینجر اسے ہراڑآن آب اٹ روزگار نا فراوانی وزرگزران ءِ زیات متنوع و سوگو کننگ اٹ کمکار مریک ۔ بینک ڈٹ انا اولیکو ریسہ ٹی مالی کمکاری فراوان کروک آ ادارہ غاتیٹی اوار ءِ، کمکاری ٹی 300 ملین ڈالر نا بنائی وام و بلوچستان حکومت نا بشخ انا زرکاری ءِ پک کننگ کن 110 ملین ڈالر نا جزوی کریڈٹ گارنٹی اوار ءِ، دا ڈٹ پاکستان نا تاریخ اٹی غٹ آن بھلا درملکی زرکاری مریک۔ اولیکو ریسہ ٹی ریکوڈک آن سالانہ اوسطاََ 8 لکھ ٹن تانبا ودی مریک و پورو مننگ آ دا دنیا نا پنچ می بھلا کاپرمائن مریک۔ تانبا توانائی نا گدریفنگ و ڈیجیٹل شونداری کن بنداوی حیثیت تخک و اودے برقی گاڈی، بیٹری، سمارٹ فون، ڈیٹاسینٹر ز و قابل تجدید توانائی ٹیکنالوجی تیٹی کاریم اٹ اتنگک۔ ضلع چاغی ٹی واقع ریکوڈک مائن آن ہزار آروزگار نا وارخواہی فراوان مریک، ہندی زرگزران ءِ سوگوی و جان جوڑی و تعلیم تون اوار راجی شونداری نا پروگرام تیٹی کمکار مریک خاص کر زالبول آتیکن خصوصی گام گیج کننگک۔ ریکوڈک مائننگ کمپنی اسیجائی ڈٹ ءِ ہراٹی بیرک مائننگ کارپوریشن تون 50 درسد، بلوچستان حکومت تون 25 درسد وخت اس کہ بنجائی حکومت نا مسہ سرکاری ادارہ غاتون جم وڑاٹ 25 درسد حصص ءِ، ڈٹ آتیا بنائی کاریم برجاسال بناکرینے وخت اس کہ تانبانا پیدوار 2028 نا ایسر اسکان گمانی ءِ۔ مائن نا گمانی عمر کم از کم 37 سال مریک و اودے سخت چاگڑدی، راجی و گورننس آب آتا رداٹ تیار کننگ انگ ءِ۔ ڈٹ بینک انا پوسکن’’کریٹیکل منرلز ٹو مینوفیکچرنگ ویلیو چینز‘‘ حکمت ءِ عملی نا رداٹ منظور مروک آ اولیکو مائننگ پروجیکٹ ءِ ہرانا مسخت ڈیہہ ءِ توانائی و ڈیجیٹل شونداری کن اہم معدنیات نا ودوک آجہانی طلب آن فائدہ سرکننگ ءِ۔