لیبیاٹی پائیدارامن، سوگوی و شونہالی کن قومی مفاہمت ءِ مون آ دننگ نا کوشست آتا گرج ءِ، پاکستان

اقوام متحدہ۔ 22 اگست (اے پی پی) پاکستان اقوام متحدہ نا سلامتی کونسل اٹی زور شاغانے کہ لیبیا ٹی پائیدارامن، سوگوی و شونہالی کن وخت آ و گچین کوشست کننگے، ہرافتے ٹی قومی مفاہمت نا مون آ دننگ و لیبیا نا منجمد میرات آتا محتاط و شفاف زرکاری اوار مرے تانکہ دا میرات آک آخبت اٹ لیبیا نا الس نا راجی آسودہی کن کاریم اٹ اتنگ مریر۔ داہیت ءِ اقوام متحدہ ٹی پاکستان نا نائب آخبتی نمائندہ عثمان جدون اقوام متحدہ نا سلامتی کونسل اٹی لیبیا نا حالیت آتیا شرہ ٹی پارے۔ اوپارے کہ نن لیبیا ٹی پائیدار امن و سوگوی کن کروک آ غٹ کوشست آتا مخ تفی ءِ کینہ۔ اوزور شاغا کہ اسہ پیدوار، متعین مدآ تالان و عمل نا قابل سیاسی لائحہ عمل اس جوڑ کننگے ہرا قومی گچین کاری تا کسر ءِ آوار کے۔ اوپارے کہ تدوک آ ہفتہ 26 بلدیاتی علاقہ غاتیٹی گچینی کاری مس وخت اس کہ سیکورٹی و ایلو سوب آتابناء آ 37 علاقہ غاتیٹی ووٹنگ مننگ کتو۔ پاکستانی نمائندہ اومیت ظاہرکرے کہ دا علاقہ غاتیٹی ہم زوت گچین کاری تے اڈترفنگک۔ اوپارے کہ اسہ لیبیائی سرکڑدہ ئی ٹی و لیبیائی ملکیت آ تالان سیاسی عمل ملک اٹی امن، قومی سیوت و شونداری نا ضمانت جوڑ مننگ کیک۔ اواقوام ءِ متحدہ نا مشن لیبیا(یواین ایس ایم آئی ایل) نا سروک ہناٹیٹے نا رپورٹ نا حوالہ ءِ ترساپارے کہ رپورٹ اٹی کیہی منفی رجحان تا ذکر ءِ کننگانے، ہرافتے ٹی دارالحکومت طرابلس و کیبی ٹی سیکورٹی نا غیریقینی حالیت، سیاسی مفاہمت نا عمل اٹی جمود و نزور زرگزرانی ٹک آک اوار ءُ۔