بنجائی وزیر ءِ واپار جام کمال خان نا بنگلہ دیش نا سلاہکار واپار شیخ بشیر الدین تون اوڑدہی، واپاری تعلقداری نا مون آ دننگ، اقتصادی کمکاری ءِ سوگو کننگ آ گپ وتران

ڈھاکہ۔ 22 اگست (اے پی پی) بنجائی وزیر ءِ واپار جام کمال خان بنگلہ دیش نا سلاہکار واپار شیخ بشیر الدین تون ڈھاکہ ٹی اوڑدہی کرے۔ جمعہ نادے آ جاری پریس ریلیز نا رداٹ اوڑدہی ٹی ہڑتوم آ کنڈآتا واپاری تعلقداری تے مون آ دننگ، زرکاری ءِ ودفنگ و اقتصادی کمکاری ءِ سوگو کننگ آ سرجمی اٹ گپ وتران کننگا۔ اوڑدہی ٹی ہڑتوم آملک آک تین پہ تینی واپاری تعلقداری تے ادارہ جاتی فریم ورک نا رداٹ مون آ دننگ آ امنا کننگا۔ دا چرجوئی ٹی پاکستان و بنگلہ دیش اسیجائی ورکنگ گروپ واپار جوڑ کننگ و 2005 آن پد غیرفعال مروک آ اسیجائی اکنامک کمیشن ءِ دُوارہ فعال کننگ نا فیصلہ ءِ کریر۔ داکان بیدس، اسہ اسیجائی ٹریڈ کمیشن اس جوڑ کننگ آہم امنا کننگا، ہرا آخبت نا واپاری روڈ میپ و ہدف آتے طے کیک۔ ہڑتوم آ راہشونک کشاری پوسکن کاری، قابل تجدید توانائی، اسٹیل انڈسٹری، شپ بلڈنگ، گرین شپ بریکنگ، حلال ٹریڈ، اِلار، برنج، معدنیات، سِل، شوگر، ڈیہائیڈریٹڈ فروٹس و ایگرو پروسیسنگ تون اوار چندی بشخ آتیٹی کمکاری نا گمان تیا گپ وتران کریر۔ اوڑدہی ٹی داہم زور شاغنگاکہ ہڑتوم آ کنڈآتا واپار ءِ مون آ دننگ کن لاجسٹکس وکنیکٹیوٹی ءِ گچین و کم خڑچ کننگے۔ ٹیرف و ڈیوٹیز اٹی کمتی اتون اوار اوار گڑاس بنگلہ دیشی مصنوعات آتے پاکستانی مارکیٹ اسکان اولیتی رسینگ تننگ نا باندات آہم ہیت مس۔ فریق آک داہیت آامنا کریر کہ پاکستان و بنگلہ دیش نا نیام اٹ واپاری لائخی بھاز زیات ءِ، ہراڑآن ہڑتوم آملک آتا الس براہ راست فائدہ ہرفنگ کیرہ۔