چیئرپرسن بی آئی ایس پی ءِ سینیٹر روبینہ خالد ءَ ضلع بونیر ءُ سوات ءِ سیلاب ءَ چہ آماچیں دمگ آنی تر ءُ تاب

اسلام آباد۔21اگست  (اے پی پی): چیئرپرسن بے نظیر انکم سپورٹ پروگرام ءِ سینیٹر روبینہ خالد ءَ ضلع بونیر ءُ سوات ءِ سیلاب ءَ چہ آماچیں دمگ آنی تر ءُ تاب کتگ۔ پنچ شمبے ءِ روچ ءَ جاڑی بوتگیں پریس ریلیز ءِ رد ءَ سینیٹر روبینہ خالد ءَ آماچیں ھاندان ءَ گوں گند ءُ نند کتگ ءُ شہید آنی واستہ فاتحہ ھم پیش کتگ۔ سینیٹر روبینہ خالد ءَ آماچیں ھاندان آناں بی آئی ایس پی ءِ سرجمیں کمک ءُ کمک ءِ دل یکیمی داتگ۔ آئی ءَ بی آئی ایس پی ءِ کارندہ آناں ہدایت کتگ کہ آ زوت آماچیں ھاندان آنی ھال ءُ اھوال آناں یکجا بہ کن اَنت دانکہ آ ریلیف پیکج ءِ تہ ءَ ھوار کنگ بہ بنت۔ سینیٹر روبینہ خالد ءَ پیر بابا ءِ مزار ءُ بنجاہی گردوارہ ءِ ھم تر ءُ تاب کتگ ءُ سکھ کمیونٹی ءِ گوما یکوئی ءِ درشانی کتگ ءُ بنجاہی الس ءَ را چاگردی آلودگی ءِ ھترہ آنی بابت ءَ سرپد کتگ۔ آئی ءَ وتی تر ءُ تاب ءِ ساھت ءَ پریس کلب سوات ءِ ھم تر ءُ تاب کتگ کہ اودا بی آئی ایس پی ءِ نیمگ ءَ موبائل رجسٹریشن گاڑی (ایم آر وی) ایر کنگ بوتگ۔ سینیٹر روبینہ خالد ءَ زالبولانی سروے ءُ رجسٹریشن ءِ عمل ءِ سر ءَ وتی نگرانی کتگ۔ اے گپ ءِ ھمراھی ءَ آئی ءَ میڈیکل کیمپ ءِ ھم چار ءُ تپاس کت ءُ اودا ھواریں ڈاکٹر ءُ رضاکاراں گوں گند ءُ نند کت ءُ خیرخواہ ءُ وشھالیں مردماں چہ اپیل کت کہ آ چہ ایشی ءَ دیم ءَ بہ رو اَنت ءُ سیلاب ءِ آماچیں مردماں گیش ءَ چہ گیش کمک بہ کن اَنت۔ چیئرپرسن بے نظیر انکم سپورٹ پروگرام ءَ ضلع بونیر ءِ درستیں دمگ آنی تر ءُ تاب کتگ کہ گوستگیں سیلاب ءَ چہ سک باز زیان بوتگ انت۔ اے دمگاں پٹیدارہ ءُ قادر نگر ھوار انت کہ اودا یکیں ھاندان ءِ 26 مردم پہ آروس ءِ مراگش ءَ یکجاہ بوتگ اتنت ءُ اناگتیں آفت ءِ سوب ءَ بیران بوتگ اتنت۔ اے تر ءُ تاب ءِ وھد ءَ روبینہ خالد ءَ جنید نامیں ورناھے ءَ گوں گند ءُ نند کتگ کہ آئی ءِ ھپتیں ھاندان ءِ مردم کہ آھانی تہ ءَ آئی ءِ مات، زھگ ءِ مات، دو برات ءِ چُک ءُ دو مات ءُ پت ھوار اَنت، درست اے وئیل ءَ وتی جان ندر کتگ اَنت۔ جنید ءِ مات بی آئی ایس پی ءِ نفع مند بوتگ۔ اے موہ ءِ سر ءَ چیئرپرسن بی آئی ایس پی ءَ زوت ڈی جی خیبر پختونخوا ءَ را ہدایت کت کہ آ وتی سرجمیں ھالاں بہ دنت تنکہ آئی ءِ کمک ءِ واستہ ھاسیں پیکج دستیاب کنگ بہ بیت۔ ایشی ءَ پد چیئرپرسن بی آئی ایس پی ءَ گوکنڈ ءِ دمگ ءَ ھم تر ءُ تاب کتگ ءُ غم ءِ آماچیں ھاندان ءِ گوما فاتحہ پیش کتگ۔ اے موہ ءِ سر ءَ آئی ءَ گوں یک کوریں پیریں مردے ءَ گند ءُ نند کتگ کہ آئی ءِ ھشت ءُ نو نزیکیں سیاد ءُ وارس اے سانحہ ءَ بیران بوتگ اَنت ءُ نوں آئی ءِ گور ءَ ایوک ءَ دو بے گناہیں چُک ھست اَنت۔ سینیٹر روبینہ خالد ءَ وتی ذاتی بستار ءَ آماچیں ھاندان ءَ را مالی کمک ھم کتگ۔ چیئرپرسن بی آئی ایس پی ءَ مزار پیر بابا ءِ ھم تر ءُ تاب کتگ ۔ اے موہ ءِ سر ءَ آئی ءَ گوشت کہ دمگ ءِ تباہی ءَ را لبزاں گوں بیان کنگ نہ بیت کہ سرجمیں شہر ءُ مزار سرجم ءَ آپ ءِ تہ ءَ ڈوب اتگ۔ ھمے رنگ ءَ آئی ءَ یک دمگی گردوارہ ءِ تر ءُ تاب ھم کتگ ءُ سکھ کمیونٹی ءِ مردماں گوں گند ءُ نند کتگ ءُ آھانی غم ءُ اندوہ ءِ درشانی کتگ۔ آئی ءَ وتی دلپدردی ءِ درشان کنگ ءَ چہ آماچیں چاگرد ءِ تکلیفاں کم کنگ ءِ کوشست کتگ۔ چیئرپرسن بی آئی ایس پی ءَ آفت ءِ آماچیں دمگ آنی تہ ءَ ھواریں ریسکیو ٹیم ءُ این جی اوز آناں چہ اپیل کت کہ آ گیش فعال کرد پیلو بہ کن اَنت ءُ زدگیں مردم آنی کمک ءِ تہ ءَ سرجمیں رنگ ءَ کمک بہ کن اَنت۔ سینیٹر روبینہ خالد ءَ ہدایت کت کہ آماچیں ھاندان آنی کمک ءِ وھد ءَ ھرچ وڑیں شو آف ءَ چہ بچگ بہ بیت ءُ آھانی وت مہ وتی ءَ را ھرچ قیمت ءَ ھیال ءَ دارگ بہ بیت۔ دمگی مردماں چیئرپرسن بی آئی ایس پی ءَ را 100 ءِ کساس ءَ بیران بوتگیں مردمانی لسٹ ھم داتگ کہ ایشی ءِ سر ءَ آئی ءَ ھدایت کتگ کہ آ زوتیں وھد ءَ ڈیٹا ءِ پٹ ءُ پول ءَ بہ کنت ءُ اے زدگیں مردماں آیوکیں ریلیف پیکج آنی تہ ءَ ھوار بہ کنت۔ آئی ءَ گوشت کہ پلاسٹک ءِ بیگ ءُ بوتل چاگرد ءِ تہ ءَ ھلاس نہ بنت ءُ آ کم کم ءَ چاگردی بدلی ءَ را گیش کن اَنت۔ اے پیغام ءَ را اجاگر کنگ ءِ ھاترا آئی ءَ وت صفائی ءِ مہم ءَ بہر زرتگ ءُ یک جاہے ءَ پلاسٹک ءِ ردی جم کتگ۔ آئی ءِ اے کار ءَ گندگ ءَ پد دمگی مردم ءُ بی آئی ایس پی ءِ ٹیم ھم اے کمپین ءَ ھوار بوت اَنت۔ چیئرپرسن بی آئی ایس پی ءَ گوشت کہ مارا نہ ایوک ءَ استیں آفت آنی دیمپانی کنگی اِنت بلکینگ ءَ آیوکیں نسل آنی واستہ یک انچیں چاگرد ءِ جوڑ کنگ لوٹ ایت کہ آ ایمن ءُ جان سلامتی ءِ زند گوازینگ ءَ بہ کن اَنت۔ سینیٹر روبینہ خالد ءَ میڈیکل کیمپس ءِ تر ءُ تاب کتگ ءُ اودا استیں ڈاکٹر ءُ رضاکاراں گوں گند ءُ نند کتگ۔ آئی ءَ آھاں دوا ءُ درمان داتگ ءُ آھانی ھزمتانی ستا کرتگ۔ چیئرپرسن بی آئی ایس پی ءَ گوشت کہ ما ھمک مشکلیں ساھت ءَ زدگیں مردم آنی ھمراہ ایں ۔ آئی ءَ وتی سئے روچی تر ءُ تاب ءِ وھد ءَ ھما درستیں جاھاں تر ءُ تاب کتگ کہ اودا ابر ءِ ٹکر ءِ سبب ءَ تاوان بوتگ، آماچیں ھانداناں گوں گند ءُ نند کتگ ءُ آھانی غم ءُ اندوہ ءِ درشانی کتگ۔ سوات شہر ءَ آئی ءَ ھم آماچیں لوگانی تر ءُ تاب کتگ ءُ اے ھاندان آناں دلبڈی داتگ کہ بی آئی ایس پی مدام آھانی ھمراھی ءَ اوشتاتگ۔