برطانیہ ءِ مزن وزیر سر کیر اسٹارمر ءِ مزن وزیر شہباز شریف ءَ نبشتگیں نمدی ءِ تہا سیلاب ءِ آماچیں مردمانی گوما یکوئی ءِ درشانی کنگ بوتگ، برطانوی حکومت ءِ نیمگ ءَ چہ بحالی ءُ نوک جوڑیشت ءِ تہا کمک ءِ جار

اسلام آباد۔21اگست  (اے پی پی):برطانیہ ءِ مزن وزیر سر کیر اسٹارمر ءَ پاکستان ءَ گوستگیں سیلاب ءِ آماچیں مردمانی گوما یکوئی ءِ درشانی کتگ ءُ گوشت کہ برطانیہ ءِ سرکار پاکستان ءِ بحالی ءُ نوک جوڑیشت ءِ واستہ ھمک رنگ ءِ کمک ءِ واستہ تیار اِنت۔ پنچ شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ چہ جاڑی بوتگیں بیان ءِ رد ءَ برطانیہ ءِ مزن وزیر سر کیر اسٹارمر ءَ مزن وزیر محمد شہباز شریف ءَ را نبشتگیں نمدی ءِ تہ ءَ مزن وزیر ءُ پاکستان ءِ اُلس ءَ را دل ءِ جہلانکی ءَ چہ دلپدردی ءُ دلپدردی ءِ درشانی کتگ۔ نمدی ءِ تہ ءَ برطانیہ ءِ مزن وزیر ءَ گوشت کہ گوستگیں روچاں پاکستان ءَ سیلاب ءِ وھد ءَ بوتگیں مزنیں کچ ءَ تباہی ءِ سر ءَ برطانوی حکومت ءُ الس ءِ نیمگ ءَ دلپدردی ءِ درشانی کتگ۔ آئی ءَ گوشت کہ آئی ءِ دل ءِ جہلانکی ءَ چہ ھمدردی گوں توامیں بیران بوتگیں مردماں اِنت، اے جاور برطانیہ ءَ نندوکیں پاکستانی نسل ءِ بازیں کھول آناں پریشانی ءِ سبب اِنت، توامیں برطانیہ ءِ مردم اے گرانیں وھد ءَ پاکستانی الس ءَ گوں یکوئی ءِ درشان کن اَنت۔ برطانیہ ءِ مزن وزیر ءَ اے جاور ھال ءِ تہ ءَ ھژدری رد عمل ءُ رضاکار آناں شگر ءُ منت گپت کہ آھاں سکیں نا شریں جاور ھال آنی تہ ءَ زدگیں مردمانی کمک کتگ۔ آئی ءَ گوشت کہ اے وشی ءِ گپ انت کہ اے موہ ءَ برطانیہ ءِ سرکار ءَ پاکستان ءِ کمک کتگ ءُ آیوکیں وھد ءَ برطانیہ ءِ سرکار پاکستان ءَ را بحالی ءُ نوک جوڑیشت ءِ واستہ ھمک رنگ ءِ کمک ءَ کنگ ءَ تیار انت۔