اولیکو اقتصادی مردم شماری اسہ عظیم سنگ میل و پاکستان نا شونداری نا کسر اٹی اسہ عظیم ءُتمبہ اسے، بنجائی وزیر احسن اقبال

اسلام آباد۔ 21 اگست (اے پی پی) بنجائی وزیرڈٹ بندی، شونداری و خصوصی گام گیج پروفیسر احسن اقبال پارینے کہ اولیکو اقتصادی مردم شماری اسہ عظیم سنگ میل و پاکستان نا شونداری نا کسر اٹی اسہ عظیم ءُ تمبہ اسے، ہراپالیسی سازی، زرکاری، روزگار، مالی وسیلہ و راجی خذمت آتون اوار غٹ بشخ آتیٹی انقلاب اس اتنگ نا سوب جوڑ مننگ کیک، مردم شماری آن دوئی معلومداری تے کاریم اٹ اتسا اڑان پاکستان نا وژن ءِ مون آ دننگ و 2035 اسکان ملکی زرگزران ءِ اسہ ٹریلین ڈالر نا زرگزران اس جوڑ کننگ نا ہدفءِ دوئی کننگ اٹ کمک رسینگک ، زرگزرانی مردم شماری آن غیررسمی بشخ آتے زرگزران نا مرکزی دنگ اٹ اتنگ، ایس ایم ایز کن پالیسی سازی و برآمدی لائخی والا ادارہ غاتے کمکاری نا فراوانی ٹی کمک رسینگک۔ پنچ شنبے نادے آ ملک انا اولیکو اقتصادی مردم شماری نا جاری کننگ نا وخت آ اڈہلوک دود آن تران کرسا بنجائی وزیرپارے کہ اینو اولیکو اقتصادی مردم شماری جاری مننگ ءِ، اقتصادی ڈٹ بندی کن سہی و راستی تیا تالان اقتصادی ڈیٹا بنداوی گرج ءِ انتئے کہ ہندا نا بنداو آ پالیسی سازی مریک، بنگلہ دیش داتم اسکان مسہ و ننا ہمسایہ ملک آک 7 اقتصادی رائے شماری کرینو، آخبت نا دور مصنوعی ذہانت و ڈیجیٹل زرگزران نا ءِ و داڑکن بنداوی ایندھن و خام مال ڈیٹامریک۔