بنجائی وزیر واپار نا بنگلہ دیشی سلاہکار صنعت تون اوڑدہی، صنعتی کمکاری ءِ ودفنگ آ امنا

ڈھاکہ۔ 21 اگست (اے پی پی) بنجائی وزیر واپار جام کمال خان پنچ شنبے نادے آ ڈھاکاٹی بنگلہ دیش نا سلاہکار صنعت، عادل الرحمان تون اوڑدہی کرے۔ پنچ شنبے نادے آجاری پریس ریلیز نا رداٹ اوڑدہی ٹی ہڑتوم آ کنڈآتا صنعتی کمکاری، زرکاری و واپار نا مون آ دننگ نا چندی پلو آتیا سرجمی اٹ گپ وتران کننگا۔ پاکستان ناہائی کمشنر بنگلہ دیش عمران حیدر ہم داوخت آ ساڑی ئس۔ اوڑدہی ٹی ہڑتوم آ راہشونک زور شاغار کہ پاکستان و بنگلہ دیش تینا صنعتی و زرگزرانی لائخی تے تین پہ تینی فائدہ کن کاریم اٹ اتیر۔ اوڑدہی ٹی فوڈ سیکورٹی، فوڈ ویلیو ایڈیشن و صنعتی ٹیکنالوجی نا ہل و تس ءِ اہم بشخ آتا وڑاٹ تالان کننگا۔ ہڑتوم آملک آک چاہندار و ڈل آتا ہن وبر نا کمک اٹ علم و آزموندہ غاتا اشتراک آہم امنا کریر ۔ بنجائی وزیر واپار جام کمال خان پارے کہ پاکستان، بنگلہ دیش نا صنعتی بشخ اٹی کمکاری، اسیجائی ڈٹ و زرکاری نا خواہندار ءِ۔ اوپارے کہ ہڑتوم آ ملک آتے اسہ اسیجائی وژن نا رداٹ ہندن ءُ سازگار زرگزرانی چاگڑد اس ودی کروئی مریک ہرا صنعتی شونداری ٹی کمکار مرے۔ اوبنگلہ دیش نا دواسازی، ٹیکسٹائل و آئی ٹی سیکٹراٹی نمان سرسہبی تا ستاءِ کرے۔ بنگلہ دیشی سلاہکار صنعت تینا ملک انا صنعتی شونداری و ودوک آ گرج آتے مون آ تخا و پاکستان تون کمکاری ٹی بھاز است خواہی نا درشانی ءِ کرے۔ اوسِل انا صنعت، جہاز سازی، شوگر انڈسٹری ، کشاری پروسیسنگ و ایس ایم ایز ءِ گمانی کمکاری نا بشخ گوندا۔