ہزار آ خاہوت دہشت گردی نا ٹھپ ءِ اینو اسکان ہرفینو، شہید آتے خراج عقیدت پیش کینہ، بنجائی وزیر داخلہ محسن نقوی

اسلام آباد۔ 21 اگست (اے پی پی) بنجائی وزیر داخلہ محسن نقوی دہشت گردی نا غٹ زہمی تے سلام پیش کرساپارینے کہ پاکستان دہشت گردی آن غٹ آن زیات زہمی ملک ءِ، ہزار آخاہوت دہشت گردی نا ٹھپ ءِ اینو اسکان ہرفینو، داکودک جون تے خراج عقیدت پیش کینہ ہرا دہشت گردی ٹی زند انا نذرانہ تسر، دہشت گردی پاکستان آن بہادر سیاستدان، جید عالم دین، فرض شناس فوجی، پولیس و سول آفیسر و بے شمار کودک شاری تے پُلا۔ دہشت گردی نا زہمی تے خراج تحسین پیش کننگ نا جہانی دے آ تینا کلہواٹی وزیرداخلہ محسن نقوی پارے کہ دہشت گردی نا برخلاف جنگ اٹی وہوک آ دترنا ہرپڑی ننا عزم و حوصلہ نا گواہی ءِ۔ سانحہ اے پی ایس نا چناتا دستر قوم انا است آتیٹی ابدی ٹھپ اس ہلا۔ دہشت گردی نا زہمی تا یات ناقابل فراموش ءِ۔ قوم مدام اوفتا مقروض سلیس۔ پاکستان دہشت گردی و دنیا نا نیام اٹ آہنی دیوال اسے آنبار سلوک ءِ۔ 21 اگست 2025 نا اقوام متحدہ نا تھیم ’’اومیت اٹی سیوت، زہمی تیکن اجتماعی گام‘‘ جہانی برادری ءِ اسیجائی حکمت عملی و پبی کمکاری نا کسر نشان ایتک۔ اوپارے کہ دہشت گردی ءِ جہانی ویل اس گوندسا ٹیکنالوجی انٹیلی جنس شیئرنگ اٹی جہانی شراکت نا کسر تے ملنگ نا گرج ءِ۔ پاکستان دہشت گردی نا برخلاف جہانی یکجہتی و کمکاری نا سوگو مخ تف ءِ۔