بنجائی وزیر چوہدری سالک حسین تون پاکستان اٹی پولینڈ نا سفیر میکئیے پیسار سکی نا اوڑدہی

اسلام آباد۔ 21 اگست (اے پی پی) بنجائی وزیر اوورسیز پاکستانیز و شونداری وسیلہ چوہدری سالک حسین تون پاکستان اٹی پولینڈ نا سفیر میکئیے پیسارسکی پنچ شنبے نادے آ داڑے اونا آفس اٹی اوڑدہی کرے۔ اوڑدہی ٹی ہڑتوم آ کنڈآتا تعلقداری و پولینڈ اٹی پاکستانی تیکن روزگار نا وارخواہی تا بابت سلاہ تیا گپ وتران کننگا۔ وزارت آن جاری پریس ریلیز نا رداٹ بنجائی وزیر چوہدری سالک حسین پارے کہ پاکستان تدوک آ اسہ سال اٹی ٹیکسٹائل، سِل، سپورٹس نا بابت 450 ملین ڈالر نا مصنوعات پولینڈ ءِ برآمد کرے۔ پولینڈ نا سفیر میکئیے پیسارسکی پاکستان نا چندی علاقہ غاتیٹی ساڑی آ دے تیٹی نوکاپ آن جونی و مالی نسخان تیا است ہسونی نا درشانی ءِ کرے۔ پولینڈ نا سفیر پارے کہ پولینڈ اٹی پاکستانی تیکن روزگار نا وارخواہی ساڑی ءِ، غیرکانودی امیگریشن ءِ توننگ کن سخت گام گیج کننگانے۔ اوپارے کہ پولینڈ نا وزیرخارجہ اکتوبر اٹی پاکستان نا دورہ ءِ کیک ہراٹی چندی مفاہمت نا یات داشت آتیا دستخط کننگک۔ چوہدری سالک حسین پارے کہ اسہ سال اٹی 7 لکھ 42 ہزار پاکستانی روزگار کن پیشن نا ملک آ تیاہنار، پاکستان ورک فورس ایکسپورٹ کننگ اٹ مچ آدنیا ٹی چارمیکو نمبر آٹی ءِ۔ پاکستان غیرکانودی امیگریشن ءِ توننگ کن سخت گام گیج کرینے، کوریا و جاپان تون  پاکستانی تے روزگار نا فراوانی کن پائلٹ پروجیکٹ سرسہبی اٹ برجاءِ۔ اوڑدہی ٹی پاکستانی تے پولینڈ اٹی روزگار نا وارخواہی تا فراوانی کن کمکاری ءِ ودفنگ آ امنا کننگا۔