پاک چین وزراء خارجہ اسٹریٹجک ڈائیلاگ نا شش می دور، سی پیک 2.0، واپاری و اقتصادی تعلقداری ، کثیر الجہتی کمکاری، السی رابطہ کون آ بشخ آتیٹی کمکاری آ گپ وتران

اسلام آباد۔ 21 اگست (اے پی پی) پاکستان نا نائب وزیراعظم و وزیرخارجہ سینیٹر محمد اسحاق ڈار و چین نا وزیرخارجہ وانگ ژی نا نیام اٹ وزراء خارجہ نا اسٹریٹجک ڈائیلاگ نا شش می دور اسلام آباد اٹی اڈ ہلک۔ پنچ شنبے نادے آ دفترخارجہ نا ترجمان نا رداٹ ہڑتوم آ راہشونک پاک۔ چین تعلقداری نا غٹ پلوآتا سرجمی اٹ جاچ ءِ ہلکر واہم علاقائی و جہانی امور آ گپ وتران کریر۔ ڈائیلاگ اٹی ہڑتوم آ کنڈآتا کمکاری نا چندی بشخ آتیا گپ وتران کننگا ہرافتے ٹی سی پیک2.0، واپاری و اقتصادی تعلقداری، کثیر الجہتی کمکاری و السی رابطہ غاک اوار ئسر۔ ہڑتوم آ راہشونک داہیت آ زور شاغار کہ پاکستان و چین نا پائیدار و اسٹریٹجک شریداری ڈیہہ اٹی امن و سوگوی کن بے کچ اہم ءِ و ہڑتوم آملک آتا شونداری و شونہالی کن المی حیثیت تخک۔ اوداعزم انا درشانی ءِ کریر کہ پاکستان و چین خڑکی رابطہ و سلابت ءِ نئے بیرہ ہڑتوم آ کنڈآتا کہول آ بلکن کثیر الجہتی فورم تیا ہم برجاتخرہ۔