کاروبار سہولت مرکز نا جوڑ کننگ آن زرکارآتے المی راہشونی، معلومداری و آسراتی دُوبریک،  وزیراعظم ناکاروبار سہولت مرکز نا بناناوخت آ گپ وتران

اسلام آباد۔ 21 اگست (اے پی پی) وزیراعظم محمد شہباز شریف پارینے کہ کاروبار سہولت مرکز نا جوڑ کننگ آن زرکارآتے بلاتاخیر، پک و المی راہشونی، معلومداری و آسراتی دُوبریک۔ او پنچ شنبے نادے آ داڑے کاروبار سہولت مرکز نا دورہ و اونا بناءِ کننگ نا وخت آ گپ وتران کریکہ۔ وزیراعظم پارے کہ اینو اسلام آباد اٹی اولیکو بزنس سہولت مرکز کاریم نا بناءِ کرینے، دا گچین آب انا مرکز ءِ ہرانا جوڑ کننگ آن زرکارآتے بلاتاخیر المی و پک معلومداری و راہشونی دُوبریک  و اوفتے اسہ ہی جاگہ غا غٹ آسراتی دُوبریک۔ وزیراعظم سینٹر آ تعینات کروک عملہ نا کسبی لائخی و انداز نا ستاءِ کرسا پارت کرے کہ زرکارآتے جہانی آب انا آسراتی فراوان کننگے، اوفتے جوان وڑاٹ خذمت آتا فراوانی ءِ پک کننگے۔ وزیراعظم دا سینٹر نا جوڑ کننگ کن زرکاری بورڈ و تعلقدار وزارت آتا کوشست آتاستاءِ کرساپارے کہ ملک انا ایلو بشخ آتیٹی ہم داوڑنا بزنس سینٹر جوڑ کننگک۔ زرکاری بورڈ انا وزیر قیصر احمد شیخ وزیراعظم ءِ پارے کہ زرکاری نا مون آ دننگ کن دا بھاز بھلو گام و پیش رفت اسے، اسہ ہی چھت انا کیرغ آن زرکارآتے غٹ المی معلومداری راہشونی و آسراتی دُوئی مریک۔ وزیراعظم مرکز نا چندی ڈیسک آتا معائنہ ءِ کرے و آسراتی تا جاچ ءِ ہلک۔ وزیراعظم ءِ تعلقدار کمامدارآک مرکز اٹی فراوان کروک آسراتی آ حوال ترسا پارے کہ ہرانٹرپرائز ءِ داڑے ہروڑنا راہشونی فراوان کننگک، چندی پلوآتا جاچ ءِ ہلنگ و سادہ وڑوڈول نا کمک اٹ قاعدہ پورو کننگ آن پد غٹ کارروائی تے کم آن کم وخت اٹی آن لائن سرتننگک۔ داکان بیدس وزیراعظم تختی نا نقاب کشائی ءِ کرسا ون ونڈو بزنس آسراتی مرکز نا بناءِ کرے۔ وزیراعظم ءِ بورڈ آف انویسٹمنٹ نا اسپیشل اکنامک زون ونگ اناکنڈآن خصوصی حوال ہم تننگا ۔ داوخت آ بنجائی وزیر آک ، اسمبلی نا باسک آک و تعلقدار بڑزکو سرکاری کمامدارآک ساڑی ئسر۔