بنجائی وزیر داخلہ محسن نقوی تون امریکہ نا قائم مقام سفیر نیٹلی بیکر نا اوڑدہی

اسلام آباد۔ 21 اگست (اے پی پی) بنجائی وزیر داخلہ محسن نقوی تون امریکہ نا قائم مقام سفیر نیٹلی بیکر اہم اوڑدہی کرے ہراٹی پاک امریکہ تعلقداری ، انسداد دہشت گردی و انسداد منشیات نا بابت شریداری اٹ کاریم آ گپ وتران کننگا۔ قائم مقام امریکی سفیر نیٹلی بیکر نشان ءِ امتیاز ملنگ آ وزیرداخلہ محسن نقوی ءِ مبارکبادی تس و وزیرداخلہ کن نیک است خواہی نا درشانی ءِ کرے۔ قائم مقام امریکی سفیر پاکستان خاص کر خیبرپختونخوا ٹی پِر و نوکاپی دِیر تاسوب آن جونی نسخان آ است ہسونی نا درشانی ءِ کرے۔ اونا پاننگ ئس کہ ننا غٹ تر ہمدردیک زوال کروک آ بندغ آتا خاہوت آتون ءُ۔ داوخت آ وزیرداخلہ محسن نقوی پائیدار جہانی امن کن مخلصانہ گام گیج آتیا امریکی صدر ڈونلڈ ٹرمپ انا بھلا کوشست آتا ستاءِ کرے۔ اونا پاننگ ئس کہ پاک بھارت تون اوار 4 جنگ آتے تورفسا امریکی صدر ڈونلڈ ٹرمپ انسانیت نا خذمتءِ کرینے۔ اومیت ءِ کہ امریکی صدر ڈونلڈ ٹرمپ انا روس یوکرائن و غزہ ٹی جنگ بندی نا کوشست آک بارآور مریرہ۔ محسن نقوی پارے کہ امریکی صدر ڈونلڈ ٹرمپ انا دور اٹی پاک امریکہ تعلقداری ٹی ودکی و گرم جوشی بسنے۔ پاکستان امن کن کروک آ ہرگام انا ستاءِ کیک۔ قائم مقام امریکی سفیر نا پاننگ ئس کہ پاکستان ننا اہم سنگت ملک ءِ۔ پاکستان تون تعلقداری تے خاص اہمیت ایتنہ۔