آخبت نا چیلنج آتے مون آتخسا ’’جان جوڑی افرادی قوت حکمت عملی‘‘ تیار کننگانے، وزیر مملکت جان جوڑی ڈاکٹر مختار بھرتھ

اسلام آباد۔ 21 اگست (اے پی پی) وزیر ءِ مملکت جان جوڑی ڈاکٹر مختار احمد بھرتھ پارینے کہ وزارت ءِ جان جوڑی آخبت نا چیلنج آتے مون آ تخسا ’’جان جوڑی افرادی قوت حکمت عملی 2025-2035‘‘ تیار کننگانے ہرا پاکستان نا جہانی زمواری تتون ہم گرنچ، شاہدی و بریبر شونداری نا اصول آتیا تالان ءِ۔ داخیال آتا درشانی ءِ او ’’ون ہیلتھ‘‘ ورکشاپ آن تران کرساکرے۔ اوپارے کہ کوویڈ۔ 19 نا جہانی دین پاکستان نا جان جوڑی نا نظام اٹی ساڑی کیہی اہم نزوری تے نمان کرے ہرافتے ٹی جان جوڑی نا ایمرجنسی تتون مون تننگ کن چاہندار افرادی قوت نا کمتی اوار ءِ۔ اوپارے کہ سال 2023نا ’’جوائنٹ ایکسٹرنل ایویلیوایشن‘‘ اٹی ہم دا خلانا پیدواری ءِ کننگا۔ اوپارے کہ پاکستان ءِ ’’ون ہیلتھ‘‘ نا رداٹ چندی بشخ آتیان تعلق تخوک آ افرادی قوت نا تیاری آ دمدستی چکار کننگ نا گرج ءِ۔ وزارت جان جوڑی ’’ہیلتھ ورک فورس سنیپ شاٹ 2025‘‘ ءِ ہم مرتب کرینے ہراٹی ’’ون ہیلتھ‘‘ نا تصور نا رداٹ انسانی، حیوانی، چاگڑدی وغذائی رکھ انا افرادی قوت نا جاچ ءِ پیش کننگانے۔ اوپارے کہ داورکشاپ ’’ون ہیلتھ‘‘ افرادی قوت نا ہیلکاری گرج آتا سہی پیدواری ٹی اہم کڑد ادا کیک ہراڑآن چاہندار آک تینے ہندن تیار کننگ کیرہ ہرافتے ٹی دینی خطرہ غاتا وخت آ تشخیص ، توننگ و گچین ورندی تننگ نا لائخی مرے۔ پاکستان ءِ ناجوڑی تا چاروکی نا ساڑی آ نظام ءِ پین سوگو کننگ نا گرج ءِ۔ خاص کر ہموبشخ آتا نیام اٹ ہرا انسانی، حیوانی و چاگڑدی جان جوڑی تون گنڈوک ءُ۔