وزیراعظم ریلیف پیکج نا رداٹ مانسہرہ ٹی ضلعی انتظامیہ ءِ نوکاپ آن زہمی تیکن کمکی گڑاوصول

ایبٹ آباد۔ 21 اگست (اے پی پی) ضلعی انتظامیہ مانسہرہ پنچ شنبے نادے آ وزیراعظم ریلیف پیکج نا رداٹ نوکاپ آن زہمی خاہوت آتیکن کمکی گڑاوصول کرے، ہراٹی الائیڈ بینک ہم کمک فراوان کرینے۔ ڈپٹی کمشنر مانسہرہ میاں بہزاد عادل دا گڑاتے اسہ دود اسے ٹی وصول کرےہراٹی ایڈیشنل ڈپٹی کمشنر (ریلیف) مانسہرہ ہم شریک ئس۔ کمکی پیکج اٹی کنوئی آ المی آ گڑاک اوار ءُ ہرافتا مسخت ساڑی آ نوکاپ آن زہمی مروک آخاہوت آتا کمک ءِ کننگ ءِ۔ اے پی پی تون گپ وتران کرسا ایڈیشنل ڈپٹی کمشنر (ریلیف) اسد لودھی پارے کہ وزیراعظم ریلیف پیکج نا رداٹ جم وڑاٹ 9 ٹرک کمکی گڑا دوئی مسنے۔ سرجم حوال آتے پارسا اوپارے کہ دا امداد اٹی خور، دوائی، تمبو و یخ آتیکن گڑاک اوار ءُ، ہراداوخت آ تحصیل بفہ پکھل نا زہمی علاقہ ڈھیری حلیم و نیل بُن (ضلع بٹگرام نا سیمی تحصیل) اٹی بشخنگ انگ ءُ۔ اسد لودھی ہندی منشاکار، ضلعی انتظامیہ و بنجائی حکومت نا وخت آ کمکاری آ تالان کوشست آتا ستاءِ کرے و باوری کرفے کہ کمکی گڑاتے شفاف وڑاٹ حقدار خاہوت آتیٹی بشخنگک ۔ اومستی پارے کہ صوبائی حکومت نا کمکاری آن داتم اسکان 300 آن 400 خورپیکج، تمبو و زند انا ایلو المی آ گڑازہمی تیٹی بشخنگانے۔ ہندی نمائندہ و سرکڑدہ غاک ہم دا گام آ است جمی نا درشانی ءِ کرسا زور شاغار کہ آفت آتون مون تننگ و زہمی خاہوت آتا بحالی کن سرکاری ادارہ، این ڈی ایم اے و مالیاتی ادارہ غاتا نیام اٹ کمکاری بایدے برجاسلے۔