وزیراعظم شہباز شریف نا سیاسی سرکڑدہ غاتون رابطہ، مچ آملک اٹی بشام نا پِر و نوکاپی حالیت آتیا گپ وتران

اسلام آباد۔ 21 اگست (اے پی پی) وزیراعظم محمد شہباز شریف مچ آملک اٹی بشام نا ترند انگا پِر و نوکاپی حالیت آتیا سیاسی سرکڑدہ غاتون رابطہ کرینے۔ وزیراعظم آفس نا میڈیا ونگ انا کنڈآن پنچ شنبے نادے آ جاری بیان نا رداٹ وزیراعظم چیئرمین پاکستان پیپلزپارٹی بلاول بھٹو زرداری تون رابطہ کرسا سویلی سندھ خاص کر کراچی ٹی شنزہ ئی آ پِر ، شاری نوکاپ آن نسخان و نہادی جون تا زیان آ است ہسونی نا درشانی ءِ کرے۔ وزیراعظم بنجائی حکومت نا کنڈآن ہلہلہ ئی حالیت آتون مون تننگ نا بابت حکومت سندھ ءِ ہروڑنا کمکاری نا پیشکش کرے۔ وزیراعظم بنجائی حکومت نا کنڈآن ہلہلہ ئی حالیت آتون مون تننگ نا بابت حکومت سندھ ءِ ہروڑنا کمکاری نا سلہ  خلک۔ وزیراعظم چیئرمین این ڈی ایم اے ءِ سندھ حکومت تون پورو رابطہ ٹی مننگ، صوبائی ڈیزاسٹر مینجمنٹ اتھارٹی ءِ ہروڑنا کمک فراوان کننگ و مخلوق ءِ گمانی خطرہ غاتا پیشگی آگاہی فراوان کننگ نا پارت کرے۔ داکان بیدس وزیراعظم امیر جماعت اسلامی حافظ نعیم الرحمان و وزیربنجائی تعلیم و کسبی تربیت ڈاکٹر خالد مقبول صدیقی تون فون آ ہیت کرے۔ وزیراعظم و امیر جماعت اسلامی خیبرپختونخوا ٹی ساڑی آ پِرتیٹی نسخان و برجاکمکی سرجزآتیا گپ وتران کریر۔ وزیراعظم پِر و نوکاپ اٹی الخدمت فاؤنڈیشن نا کنڈآن ریسکیو و کمکی سرجزآتیٹی زیات آن زیات بشخ ہلنگ نا گام انا ستاءِ کرے۔ وزیراعظم و ڈاکٹر خالد مقبول صدیقی نا نیام اٹ سندھ اٹی ساڑی آ پِر و نوکاپی حالیت و گمانی پِر تا گمانی خطرہ غاتا بابت گپ وتران مس۔ وزیراعظم بنجائی حکومت نا کنڈآن ہروڑنا ہلہلہ ئی حالیت آتون مون تننگ کن این ڈی ایم اے و ایلو بنجائی ادارہ غاتا پبی کمکاری نا باوری کرفے۔