اورنگزیب کھچی ءَ قائمہ کمیٹی ءِ چیئرپرسن سیدہ نوشین افتخار ءَ گوں گند ءُ نند

اسلام آباد۔20اگست  (اے پی پی): راجی ورثہ ءُ دود ءُ ربیدگ ءِ وفاقی وزیر اورنگزیب خان کھچی ءَ راجی ورثہ ءُ دود ءُ ربیدگ ءِ بابت ءَ راجی اسمبلی ءِ قائمہ کمیٹی ءِ چیئرپرسن سیدہ نوشین افتخار ءَ گوں گند ءُ نند کت ایشی ءِ تہ ءَ دود ءُ ربیدگ ءِ رکھینگ ءُ دیمروئی ءِ ھوالگ ءَ سرجمیں گپ ءُ تران کنگ بوت۔ وفاقی وزیر ءَ راجی اسمبلی ءِ قائمہ کمیٹی برائے راجی ورثہ ءُ دود ءُ ربیدگ ءِ ذمہ واری آنی سر ءَ سیدہ نوشین افتخار ءَ را مبارک بات دات ءُ گوشت کہ آ وت ءَ را وش بھت لیک ایت کہ آئی ءَ را چیئرپرسن ءِ گوما کار کنگ ءِ موہ رستگ۔ سیدہ نوشین افتخار ءِ جزبگ ءُ ذمہ واری آناں ساڑہ کنان ءَ آئی ءَ گوشت کہ وزارت راجی میراث ءُ دود ءُ ربیدگ کمیٹی ءِ گوما ھمک پڑ ءَ سرجمی ءَ کمک کنت۔ مئے دود ءُ ربیدگ ءُ میراث صدیاں چہ گیش اِنت، ایشی ءِ رکھینگ ءُ دیمروئی منی اولی ترجی اِنت۔ آئی ءَ اے گپ ءِ پدرائی کت کہ وزارت ءِ چیر دستی ءَ ادارگ آنی مول ءُ مراد منافع ءِ ھاترا نہ انت بلکیں راجی ورثہ ءَ را آیوکیں نسل آناں سر کنگ ءُ السی تک ءَ ایشی ءِ سرپدی ءَ را دیم ءَ برگ انت۔ وفاقی وزیر ءَ گوشت کہ قائداعظم ءُ علامہ اقبال ءِ وڑیں راجی بامرد آنی گوما سیادی داروکیں ادارگ راجی پجار ءِ بھر اَنت ءُ مزن وزیر ءِ پنت ءُ شون ءِ رد ءَ اے وڑیں ادارگ ہچ وڑیں جاور آنی تہ ءَ ھلاس کنگ نہ بنت۔ اے موہ ءِ سر ءَ وزیر ءَ چیئرپرسن ءَ را وزارت ءِ چیر دستی ءَ ادارگ آنی کارکردگی ءُ برجاھیں منصوبگ آنی بابت ءَ ھم سرپد کت ءُ گوشت کہ کمیٹی ءِ ھمک دیوان ءَ سرجمی ءَ کمک پجاری کنگ بیت۔ آئی ءَ گوشت کہ 18می ترمیم ءَ چہ پد گیشتریں ادارگ صوبہ آں دیم دیگ بوتگ انت۔ قائمہ کمیٹی ءِ چیئرپرسن سیدہ نوشین افتخار ءَ گوشت کہ دود ءُ ربیدگی ادارگ آنی کارکردگی ءَ گیش گہتری ءِ ضلورت انت۔ آئی ءَ گوشت کہ اے منی وش بھتی انت کہ من ءَ شمئے گوما کار کنگ ءُ جوانیں چاگرد ءَ وانگ ءِ موہ رسگ ءَ انت۔ من اے کمیٹی ءِ زمہ واری مزن وزیر ءِ واھگ ءِ سرا زرتگ پرچا کہ آ اے شوبگ ءَ حاصیں دلگوشی دیگ لوٹیت۔ دیوان ءَ پیسلہ کنگ بوت کہ وزارت ءِ درستیں چیردستی ادارگ چیئرپرسن ءَ را باقاعدہ بریفنگ دیئگ ءَ انت۔ اے موہ ءِ سر ءَ سیکرٹری راجی میراث ءُ دود ءُ ربیدگ اسد رحمان گیلانی ھم ساڑی ات۔