شنگھائی تعاون آرگنائزیشن ءِ ملکانی گوما چین ءِ سوداگری 6 ماہ ءِ تہا نزیک ءَ 250 ارب ڈالر ءَ سر بوتگ

اسلام آباد۔20اگست  (اے پی پی):چین ءِ شنگھائی کوآپریشن آرگنائزیشن ءِ باسکیں ملک آنی گوما اے سال ءِ اولی شش ماہ ءِ تہ ءَ نزیک ءَ 250ارب ڈالر ءِ بیپار بوتگ۔ چین ءِ وزارت تجارت ءِ بیان ءِ رد ءَ چین ءِ 2025 ءِ اولی نیمگ ءَ ایس سی او ءِ دگہ باسکیں ملک آنی گوما چین ءِ تجارت 247.7 ارب ڈالر ءَ سر بوتگ۔ ایس سی او ءِ شریک آنی واستہ چین ءِ مزنیں برآمدات آنی تہ ءَ مشینری ءُ الیکٹریکل پروڈکٹس، گاڑی ءُ پارٹس، گارمنٹس ءُ کیمیکلز ھوار اَنت۔ درآمدات گیشتر تیل ءُ گیس، زرعی پیداوار، کوئلہ ءُ کان کنی انت۔ گوستگیں پنچ سال آنی تہ ءَ چین ءُ ایس سی او ءِ ایندگر باسک آنی نیام ءَ بیپار ءَ را 300ارب ڈالر، 400ارب ڈالر ءُ 500ارب ڈالر ءِ سنگ میل ءَ چہ مدام گیش بوتگ ءُ 2024ءَ ریکارڈ 512.4ارب ڈالر ءَ سر بوتگ کہ گوستگیں سال ءِ مقابلہ ءَ 2.7درسد گیش اِنت۔ سرمایہ کاری ءُ معاشی تکنیکی کمک ھم کم کم ءَ دیم ءَ روگ ءَ اِنت۔ جون 2025 ءِ تک ءَ ایس سی او ءِ ملک آنی تہ ءَ چین ءِ براہ راست سرمایہ کاری ءِ اسٹاک 40 ارب ڈالر ءَ چہ گیش بوتگ ات کہ ایشی ءِ تہ ءَ توانائی، کان کنی ءُ انفراسٹرکچر ءَ بگر داں ڈیجیٹل معیشت ءُ سبزیں دیمروئی ءِ وڑیں نوکیں شعبہ آناں ھوار ات۔ چینی کمپنی 5G، انٹرنیٹ ءُ سمارٹ شہرانی تہا SCO ءِ باسکاں گوں تعاون ءَ گیش کنگ ءَ انت، دمگی صنعتاں بدلی ءُ نوکیں دروشم ءَ را تیز کنگ ءَ کمک کنگ ءَ انت۔