وفاقی وزیر داخلہ محسن نقوی ءَ پردیش پور ماڈل ویلج ءَ تجاوزات ءُ ناجائزیں جوڑیشتانی ھلاپ ءَ سرجمیں آپریشن ءِ پنت ءُ شون

اسلام آباد۔20اگست  (اے پی پی):‎ وفاقی وزیر داخلہ محسن نقوی ءَ پردیش پور ماڈل ویلیج ءَ تجاوزات ءُ ناجائزیں جوڑیشت آنی ھلاپ ءَ سرجمیں آپریشن ءِ پنت ءُ شون داتگ۔ انوگ ءَ تاں 200 ناجائزیں جوڑیشت ھلاس کنگ بوتگ اَنت، نیشنل پارک ءِ 191 کنال زمین چہ قبضہ کنوکاں برآمد کنگ بوتگ، بازیں سالاں کرایہ نہ داتگیں مردماں چہ ماڑی یلہ کنگ بوتگ اَنت، نوں اے جائیداد نیلام کنگ بنت۔ وزارت داخلہ ءِ جارکش ءِ رد ءَ 360کنال زمین ءِ سر ءَ 2005 ءَ پد جوڑ بوتگیں ناجائزیں جوڑیشت آنی ھلاپ ءَ بے رھبندیں کارروائی کنگ بوھگ ءَ اِنت۔ وفاقی وزیر داخلہ محسن نقوی ءَ سید پور ماڈل ویلیج ءِ تر ءُ تاب کتگ ءُ ناجائزیں جوڑیشت آنی حلاف ءَ آپریشن ءِ سرا چار ءُ تپاسی کتگ۔ وزیر داخلہ محسن نقوی ءَ میتگ سید پور ءِ اپ گریڈیشن ءُ زیبائی ءِ کار آنی دیمروئی ءِ چار ءُ تپاسی کت۔ وزیر داخلہ محسن نقوی ءَ سید پور میتگ ءِ کش ءُ گور ءَ تجاوزات ءُ ناجائزیں جوڑیشت آنی ھلاپ ءَ بے رھبندیں کارروائی ءَ را برجاہ دارگ ءِ پرمان داتگ۔ وزیر داخلہ محسن نقوی ءَ ناجائزیں جوڑیشت آنی حلاف ءَ آپریشن ءِ تہ ءَ سی ڈی اے ءِ کارکردگی ءِ توسیپ کنان ءَ گوشت کہ دمگ ءَ ھر وڑیں ناجائزیں جوڑیشت آنی ھلاسی اولی ترجی اِنت۔ کراچی ءُ لاہور ءِ نامداریں ریستوراں سید پور میتگ ءَ آرگ بنت۔ محسن نقوی ءَ گوشت کہ سید پور ویلیج ءِ بحال کنگ ءَ چہ اسلام آباد ءِ زیبائی گیش بیت ءُ شہری آناں یک نوکیں دلگوشی ءِ چاگردے پجاری بیت۔ سید پور میتگ ءَ را یک جھان ءِ درجہ ءِ دلگوشی ءِ مرکز جوڑ کنگ ءِ ھاترا درستیں وسیلگ آناں کارمرد کنگ بہ بیت۔ وزیر داخلہ ءَ سی ڈی اے ءُ ڈی ایم اے ءِ کارندہ آناں پنت ءُ شون کتگ کہ آ میتگ ءِ کش ءُ گور ءَ صفائی ءَ را دل یکیمی بہ کن انت۔ آئی ءَ گوشت کہ سید پور ویلج آیوکیں وھد ءِ نوکیں تجارتی مرکز جوڑ بیت، ایشی ءِ تہ ءَ سیل ءُ سواد کنوک آناں کوالٹی ءِ آسراتی پجاری کنگ بیت۔ وزیر داخلہ ءَ را بریفنگ ءِ تہا گوشگ بوت کہ 2005ءَ چہ پد جوڑ بوتگیں تعمیرات آنی پجار سیٹلائٹ امیجری ءِ وسیلگ ءَ کنگ بوھگ ءَ انت۔ سید پور ماڈل ویلیج ءِ گرین کور ءِ دمگ ءِ نوک جوڑ کنگ بوھگ ءَ اِنت۔ سی ڈی اے ءِ چیئرمین محمد علی رندھوا ءَ سید پور ویلیج منصوبگ ءِ چیر دستی ءَ کار آنی دیمروئی ءِ بابت ءَ سرجمیں بریفنگ دات۔ اے موہ ءِ سر ءَ سی ڈی اے، اے ڈی سی جی، ایس ایس پی آپریشنز ءِ باسک ءُ سیادی داروکیں کارندہ ھم ساڑی بوتگ اَنت۔