شہری سیلاب ءَ چہ انسانی جان ءُ مال ءَ تاوان رستگ، تاں انوگ ءَ 25 ہزار مردم ایمنیں جاہاں شنگ کنگ بوتگ انت، 70 درسد آماچیں دمگاں بجلی برجا بوتگ، عطا اللہ تارڑ

اسلام آباد۔19اگست  (اے پی پی): وفاقی وزیر ءِ اطلاعات ءُ شنگکاری عطا اللہ تارڑ ءَ گوشت کہ گوستگیں مون سون ءِ ھور ءُ شہری سیلاب ءِ سبب ءَ بازیں انسانی جان ءُ مال ءَ را تاوان رستگ، مزن وزیر محمد شہباز شریف ءِ ھاسیں ہدایت ءِ رد ءَ وفاقی دمگ ءِ تہ ءَ ریسکیو ءُ ریلیف ءِ کار گیش کنگ بوتگ اَنت۔ حکومت، پاکستانی فوج، NDMA ءُ صوبائی حکومت آنی نیمگ ءَ تاں انوگ ءَ 25 ہزار مردم ایمنیں جاھاں شنگ کنگ بوتگ اَنت، 70 درسد دمگ آنی تہ ءَ بجلی ءِ رکینگ بوتگ، ٹرانسفارمر، پول ءُ تار ھمگرنچیں دمگ آنی تہ ءَ سر کنگ بوتگ اَنت، ھاسیں نادراھجاہ آنی تہ ءَ بے رکاوٹیں بجلی ءِ سپلائی کنگ بوتگ، پمپ، 1200 ءَ چہ گیش ٹینٹ، 1000 کلوگرام ءِ دوائی ءُ 40ٹن راشن پیک آماچیں دمگاں سر کنگ بوتگ انت، وھدیکہ 500 ءَ چہ گیش میڈیکل ریفئل کیمپ جوڑ کنگ بوتگ انت۔ آ سئے شمبے ءِ روچ ءَ نیشنل ڈزاسٹر مینجمنٹ اتھارٹی ءِ ڈائریکٹر جنرل آئی ایس پی آر احمد شریف چوہدری ءُ این ڈی ایم اے ءِ چیئرمین انعم حدیر ملک ءِ گوما مون سون ءِ ھور ءُ زمین چنڈ ءِ جاور ھال آنی بابت ءَ میڈیا ءَ را سرپد کنگ ءَ ات۔ وفاقی وزیر اطلاعات ءَ گوشت کہ راجی آفت آناں گر ءُ چیل بوھگ ءِ واستہ این ڈی ایم اے ءَ نوکیں ٹیکنالوجی ءِ سر ءَ بنیات ءِ سر ءَ یک نوکیں نظام جوڑ کتگ ایشی ءِ مول ءُ مراد موسمی جاور ھال آنی سر ءَ فیڈریشن، صوبگ ءُ ایندگر ادارگ آنی نیام ءَ یکجاھیں ھمگرنچی ءِ جوڑ کنگ اِنت۔ اے مرکز ءِ اولی روچ ءَ چہ درستیں سیادی داروکیں ادارگ ءُ صوبہ آناں وھد ءِ سر ءَ سرپدی دیگ بوھگ ءَ اِنت ءُ یک موثریں ھمگرنچی ءِ نظام ءِ جاہ ءَ اِنت۔ آئی ءَ گوشت کہ مزن وزیر ءِ ہدایت ءِ رد ءَ وفاقی حکومت، پاک فوج، این ڈی ایم اے ءُ صوبائی حکومت یکجائی حکمت عملی ءِ چیر دستی ءَ آفت ءِ استیں جاور ھال ءَ گوں گر ءُ چیل بوھگ ءِ واستہ کار کنگ ءَ انت۔ مہلوک ءَ را ریلیف پجاری کنگ بوہگ ءَ انت ءُ ریسکیو کار ترند کنگ بوتگ انت ۔ تاں انوگ ءَ 25 ہزار مردم امنیں جاہاں شنگ کنگ بوتگ انت۔ آئی ءَ گوشت کہ اے ھما وھد اِنت کہ مارا درستاں یکجا بوھگی اِنت ءُ اے ایمرجنسی جاور ھال ءَ گوں گر ءُ چیل بوھگی اِنت۔ اے درگت ءَ سرجمیں زانتکاری درستیں سیادی داروکیں ادارگاں ریئل ٹائم ءَ سر کنگ بوھگ ءَ اِنت۔ ریسکیو ءُ ریلیف ءِ ھاتر ءَ ھم یک ھمگرنچیں رھبند ءُ منصوبہ یے ھست۔ عطا اللہ تارڑ ءَ گوشت کہ خیبر پختونخوا ءِ ضلع بنیر، شانگلہ، باجور ءُ سوات ءَ بجلی ءِ نظام ءَ را تاوان رستگ، بلے گوستگیں 48کلاک آنی تہ ءَ 70درسد دمگ آنی تہ ءَ بجلی برجا بوتگ ءُ رند ءَ چہ رند ءِ فیڈر ءُ گرڈ آنی سر ءَ کار برجاہ اِنت۔ آئی ءَ گوشت کہ وفاقی وزیر اویس لگاری ءَ مزن وزیر ءَ گوں گند ءُ نند کت وزارت مواصلات ءُ انفارمیشن ٹیکنالوجی ءِ ھاسیں ہدایت ءِ سر ءَ آ سوات ءَ است انت ءُ بجلی ءِ سرجمیں برجای ءَ تاں اودا مانیت۔ آئی ءَ گوشت کہ سوات ءَ آماچیں 35 فیڈر آنی تہ ءَ چہ 25 فیڈر برجا کنگ بوتگ، بنیر ءَ 3 فیڈر برجا کنگ بوتگ، 9 فیڈر برجا کنگ بوتگ انت وھدیکہ بقیہ آنی سر ءَ کار برجاہ انت۔ ھمے رنگ ءَ شانگلہ ءَ گیشتریں فیڈر برجا کنگ بوتگ انت ءُ ٹرانسفارمر، پول ءُ تار، لوٹوکیں سامان ھمگرنچیں دمگاں سر کنگ بوتگ انت وھدیکہ ھاسیں اسپتال آنی تہ ءَ بے رکاوٹ ءَ بجلی ءِ سپلائی کنگ بوتگ ءُ آیوکیں لھتیں روچ آنی تہ ءَ سد درسد بجلی ءِ برجای ءِ واستہ کوشست کنگ بوھگ ءَ انت۔ آئی ءَ گوشت کہ وفاقی وزیر بجلی ءُ مواصلات امیر مقام باجور ءَ ءُ وفاقی وزیر مواصلات اولان باتور خان گلگت ءَ ساڑی انت ءُ مواصلات ءِ نظام ءِ برجای ءِ نگرانی ءَ کنگ ءَ انت۔ وزارت مواصلات، نیشنل ہائی وے اتھارٹی، ایف ڈبلیو او ءُ پاکستانی فوج ءِ ادارگ، ملاکند ڈویژن این 90، خواجہ ءِ نیام ءَ جوانیں ہمگرنچی است انت کھیلا ءُ بشم ءِ روڈ سئے جاہ ءَ بند کنگ بوتگ، کہ آ پچ کنگ بوتگ انت۔ پاک فوج ءُ وفاقی حکومت ھم استحک پل ءِ برجای ءِ واستہ گامگیج کنگ ءَ انت ۔ ٹریفک ءِ واستہ سڑک پچ کنگ بیت ءُ آپ ءِ چینل دریا ءِ نیمگ ءَ کشگ بیت۔ امیت انت کہ اے پُل زوت پدا جوڑ کنگ بیت کہ ایشی ءَ چہ جگلوٹ ءُ اسکاردو ءِ راہ ءِ پچ کنگ ءَ ھم کمک رسیت۔ وفاقی وزیر ءِ اھوالکاری ءَ گوشت کہ مزن وزیر ءَ صوبائی سڑک آناں برجای ءِ واستہ توامیں ادارگ آناں ھاسیں ہدایت ھم داتگ، بلے بابا ءِ دمگ ءَ مشکلات بوتگ، اودا نیم سڑک چست کنگ بوتگ ءُ باکی ءِ سر ءَ کار برجاہ انت۔ وفاقی وزیر ءَ گوشت کہ اے راجی زمہ واری اِنت ایشی ءِ سر ءَ وفاقی ءُ صوبائی حکومت راجی کیز ءِ چیر دستی ءَ یکجائی ءَ کار کنگ ءَ اَنت۔ آئی ءَ گوشت کہ ریلیف ءُ ریسکیو ءِ واستہ سوات ءُ شانگلا ءَ گیش کاروان روان دیگ بوھگ ءَ انت، جنریٹر ءُ ڈیواٹرنگ پمپ ھم ریلیف ءِ سامان آنی تہ ءَ ھوار انت، نزیک ءَ 1200 گاڑی اے دمگ آنی تہ ءَ روان دیگ بوتگ انت۔ ہاں 10 ہزار کلوگرام ءَ چہ گیش دوائی داتگ ءُ 500 ءَ چہ گیش طبی امدادی کیمپ جوڑ کنگ بوتگ انت۔ آئی ءَ گوشت کہ اسلام آباد پمز ءَ چہ ھاسیں میڈیکل ٹیم ھم دیم دیگ بوتگ، انوگ ءَ تاں 40ٹن راشن پیک ھم آماچیں دمگ آنی تہ ءَ روان دیگ بوتگ۔ وفاقی وزیر ءَ گوشت کہ آزات کشمیر ءِ واستہ ھم ھور ءِ پیش گوئی کنگ بوتگ، اے درگت ءَ آزات کشمیر حکومت ءَ را سرپد کنگ بوتگ ءُ وفاقی حکومت ھم وتی کرد ءَ پیلو کنگ ءَ انت۔ وفاقی وزیر ءِ اھوالکاری ءَ راج ءَ چہ اپیل کت کہ آ اے گرانیں وھد ءَ یکجائی بہ کن اَنت ءُ وتی ذمہ واری ءَ پیلو بہ کن اَنت۔ آئی ءَ ڈی جی آئی ایس پی آر ءُ چیئرمین این ڈی ایم اے ءِ منت گپت ءُ گوشت کہ وفاقی حکومت، پاک فوج ءُ این ڈی ایم اے صوبائی حکومت آنی گوما مُدامی رابطہ ءَ انت، اے وھد ءَ ما درست یکجا آں ءُ نیشنل رسپانس ءِ چیر دستی ءَ اے جیڈھ آنی سر ءَ چہ گر ءُ چیل بوھگ ءِ واستہ یکجائی ءَ کار کنگ ءَ ایں ۔ آئی ءَ گیش گوشت کہ زوتیں ھال نظام ءِ وسیلگ ءَ آیوکیں لھتیں روچ آنی موسم ءِ پیش گوئی درستیں ادارگ آناں سر کنگ بوھگ ءَ اِنت، ءُ میڈیا ءَ را ھم وھد ءِ سر ءَ سرپدی دیگ بیت۔