موسمیاتی بدلی تا نسخان دہ اثرآتیان بچنگ کن شجرکاری و جنگل آتا کچ اٹی ودکی مربوط و جوان ءُ حکمت عملی اسے نا رداٹ ممکن ءِ، وزیراعظم شہباز شریف

اسلام آباد۔ 19 اگست (اے پی پی) وزیراعظم محمد شہباز شریف پارینے کہ موسمیاتی بدلی تا نسخان دہ اثرآتیان بچنگ کن شجرکاری و جنگل آتا کچ اٹی ودکی مربوط و جوان حکمت عملی نا رداٹ ہی ممکن ءِ، بشام نا بھلا پِر و نوکاپی دِیرتیان مروک آ بھسکاری و جونی ومالی نسخان اسہ وار ولدا پک کرینے کہ پاکستان کن جنگلات المی ءِ، پاکستان موسمیاتی بدلی تیان بدترین زہمی ملک آتا لڑاٹی اوار ءِ، وزارت موسمیاتی بدلی’’جہانی موسمیاتی بدلی ‘‘کانفرنس کن پورو تیاری کے۔ سے شنبے نادے آ وزیراعظم آفس نا میڈیا ونگ انا کنڈآن جاری بیان نا رداٹ اوداخیال آتا درشانی ءِ سالانہ’’بشام شجرکاری مہم‘‘ نا بناء آ دیوان نا کماشی ءِ کرسا کرے۔ وزیراعظم سالانہ بشام شجرکاری مہم نا بنااولیکو ہفتہ نا سرحال ’’ایک بیٹی۔ ایک شجر‘‘ آن کرے۔ دیوان اٹی بنجائی وزیر موسمیاتی بدلی ڈاکٹر مصدق ملک، وزیرمملکت خزانہ بلال اظہرکیانی ، وزیر مملکت موسمیاتی بدلی شذرہ منصب، قومی اسمبلی و سینیٹ نا باسک ، ایلو بڑزکو سرکاری کمامدار و عہدیدارآک بشخ ہلکر۔ وزیراعظم پارے کہ شجرکاری اہم قومی، چاگڑدی و موسمیاتی فریضہ ءِ، غٹ شاری تیٹی اونا احساس زمواری ودی کننگ المی ءِ، شجرکاری بروک آ چین تیکن جان جوڑ، قدرتی چاگڑد نا رکھ و موسمیاتی تغیر آن مروک آ بھسکاری تیان بچنگ کن اولیت ءِ۔ اوپارے کہ بنجائی حکومت شجرکاری مہم ءِ سرسہب کننگ کن ہرممکن کمک فراوان کیک، غٹ صوبائی حکومت آک، راجی و مذہبی راہشون و غٹ تپہ و زند انا بشخ و خاص کر طالب علم آک مربوط وڑاٹ شجرکاری مہم اٹی تینا تعمیری کڑد ءِ ادا کیر۔ وزیراعظم پارت کرے کہ غٹ تعلقدار کمامدارآک داہیت ءِ پک کیر کہ شجرکاری مہم بیرہ علامتی کارروائی مف اوڑآ گچین عملدرآمد مرے و شجرکاری مہم اٹی خلوک آ نیال آتا افزائش و شرح نمو نا پوسکن ٹیکنالوجی نا کمک اٹ چاروکی ءِ کننگے۔ اوپارے کہ شجرکاری انسانی زند آ مثبت اثر و بیش بہانہادی قدرتی وسیلہ، حیوانات و نباتات نا رکھ و افزائش اٹی اہم حیثیت تخک، موسمیاتی بدلی نا نسخان دہ اثرآتیان بچنگ کن شجرکاری و جنگل آتا کچ اٹی ودکی مربوط و جوان حکمت عملی نا رداٹ ممکن ءِ۔ اوپارت کرے کہ آزاد کشمیر، گلگت بلتستان اٹی موسمی و نوکاپی بھسکاری تا ازالہ کن شجرکاری آ خاص چکار کننگے، مارگلہ نا مش تیٹی جنگل آتا رکھ اکن جوان موسم و ڈغار نا زرخیزی ءِ کاریم اٹ اتسا بشام اٹی بیج آتا دستیابی و اوفتا بوائی کن حکمت عملی اس ترتیب تننگے۔ وزیراعظم پارے کہ پاکستان موسمیاتی بدلی تیان بدترین زہمی ملک آتا لڑاٹی اوار ءِ، وزارت موسمیاتی بدلی جہانی موسمیاتی بدلی کانفرنس کن پورو تیاری کے۔ وزیراعظم پارے کہ ساڑی آ بشام سیزن نا بھلا پِر و نوکاپی دِیرتیان مروک آ بھسکاری و جونی ومالی نسخان اسہ وار ولداداپک کرے کہ پاکستان کن جنگلات المی ءِ۔ وزیراعظم ءِ دیوان اٹی پاننگاکہ شجرکاری مہم اٹی اگست آن اکتوبر 2025اٹی پاکستان نا طول و عرض اٹی 41 ملین پوسکن ءُ نیال خلنگک، حکومت بشام شجرکاری مہم ءِ برجاسال چندی ہفتہ وار سرحال آتا رداٹ اڈتننگ ءِ تانکہ شجرکاری نا اہمیت و چندی تپہ غاتیٹی اونا کڑد ءِ تالان کننگ مرے۔ وزیراعظم ءِ پاننگاکہ حکومت برجاسال چندی ہفتہ وار سرحال آتا رداٹ سالانہ بشام شجرکاری اڈتننگ ءِ ہرافتے ٹی ’’ایک بیٹی۔ ایک شجر‘‘، ’’ہری چھتری‘‘ ، ’’ایک پودا ہر شہید کے نام ‘‘، ’’ واسلام و شجرکاری‘‘ اوار ءُ، دا سرحال آتا مسخت شجرکاری و موسمیاتی بدلی آن بچنگ کن زالبول، ورنا، چندی ادارہ غاتا شمولیت تون ننا شہید آتا قربانی تے خراج تحسین پیش کننگ اوار ءِ۔