ملک آن پولیو نا پورو چٹفنگ کن جان جوڑی بشخ انا ٹیم، پولیوورکرز و غٹ تعلقدار ادارہ غاک سنبرینگوک ءُ، وزیراعظم محمد شہباز شریف

اسلام آباد۔ 19اگست (اے پی پی) وزیراعظم محمد شہباز شریف پارینے کہ ملک آن پولیو نا پورو چٹفنگ کن جان جوڑی نا بشخ انا ٹیم، پولیوورکرز و غٹ تعلقدار ادارہ غاک سنبرینگوک ءُ، پولیو نا چٹفنگ اٹی مشکلات ارے ولے دا ناممکن اف، پولیو مہم آتیٹی پولیوورکرز آتا اہم کڑد ستاکڑزک۔ سے شنبے نادے آ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم محمد شہباز شریف داخیال آتا درشانی ءِ روٹری انٹرنیشنل فاؤنڈیشن نا صدر فرانسسکو اریزو نا کماشی ٹی اوڑدہی کن بروک آ ڈل اتون گپ وتران کرے۔ اوڑدہی ٹی بنجائی وزیر ءِ جان جوڑی سید مصطفیٰ کمال، وزیراعظم نا پولیو تور اکن خصوصی نمائندہ عائشہ رضافاروق و تعلقدار بڑزکوکمامدارآک ساڑی ئسر۔ وزیراعظم روٹری انٹرنیشنل تون پولیو کون آ موذی مرض انا پاکستان آن چٹفنگ کن ایلو جہانی ادارہ غاتیانبار پبی کمکاری آ منت واری ءِ ہرفے۔ اوپارے کہ ملک آن پولیو نا پورو چٹفنگ کن جان جوڑی بشخ انا ٹیم، پولیوورکرز و غٹ تعلقدار ادارہ غاک سنبرینگوک ءُ، پولیو نا چٹفنگ نا کسر اٹی چیلنج ضرور ارے ولے نن تینا عزم وخواری اٹ پاکستان نا چناتا آخبت ءِ رکھ جوڑ کینہ۔ وزیراعظم پارے کہ پولیو نا چٹفنگ اٹی مشکلات ارے ولے دا ناممکن اف، پولیو مہم آتیٹی پولیوورکرآتا اہم کڑد ستاکڑزک۔ ڈل حکومت نا پولیو تور گام گیج آتا ستاءِ کرے و اومیت ظاہر کرے کہ وزیراعظم نا خصوصی چکار و سرکڑدہ غاتا سوب پاکستان آن زوت دا موذی مرض انا چٹفنگ ممکن مریک۔ ڈل روٹری انٹرنیشنل نا پولیو تور اکن حکومت نا کمکاری ءِ برجاتخنگ نا عزم انا درشانی ءِ کرے۔ ڈل وزیراعظم ءِ پارے کہ روٹری انٹرنیشنل تدوک آ سال 500 ملین ڈالر پولیو تور انا مد اٹی پاکستان اٹی خڑچ کرے و برجاسال ہم دامسخت کن بھلو زر اس خڑچ کننگ نا خواہندار ءِ۔ ڈل وزیراعظم نا پولیو تور اکن ٹیم انا گچین کاری و ٹیم انا کنڈآن گام گیج آتا ہم ستاءِ کرے۔