اسپیکر و ڈپٹی اسپیکر قومی اسمبلی نا نوکاپی دِیر تیان نہادی جون تا زیان آ ڈکھیائی و است ہسونی نا درشان

اسلام آباد۔ 19 اگست (اے پی پی) اسپیکر سردار ایاز صادق و ڈپٹی اسپیکر سید غلام مصطفیٰ شاہ ئسک گلگت بلتستان، خیبرپختونخوا و آزاد کشمیر اٹی نوکاپی دِیر تیان نہادی جون تا زیان آ ڈکھیائی و است ہسونی نا درشانی ءِ کرسا نوکاپ آن زہمی خاہوت آتون ہمدردی و یکجہتی نا درشانی ءِ کریر۔ اسپیکر سردار ایاز صادق وڈپٹی اسپیکر سید غلام مصطفیٰ شاہ ئسک تینا اسہ اسہ تُو انا تنخواہ تے نوکاپ آن زہمی تے تننگ نا فیصلہ کریر۔ سے شنبے نادے آقومی اسمبلی سیکرٹریٹ نا رداٹ اسپیکر پارے کہ مشکل وخت اٹی نوکاپ آن زہمی تے تنیا اِلیپنہ۔ نوکاپ آن زہمی تا بحالی کن مچ آ قوم ءِ مون آ بروئی مریک۔ زہمی تا کمک و بحالی قومی فرض ءِ۔ پاکستانی قوم مدام مشکل وخت اٹی ایلمی و جوزہ ایثار نا مثل اس قائم کیک ۔ نوکاپ آن زہمیک ننا اجتماعی چکاروعملی کمک نا چاری ءُ۔ ہرپاکستانی نا فرض ءِ کہ او زیات آن زیات نوکاپ آن زہمی تا بحالی و امداد کن مون آ بریر، ننا ایلم و ایڑھک داوخت مشکل و کرب آن گدرینگ انگ ءُ، ہرافتا دوست آتا لاش آک داسکان ملیتنو اوفتاڈکھیائی تا مداوا مشکل ءِ، بونیر اٹی خاہوت آتا خاہوت آک تباہ مسنو، کنا ہمدردی اوفتا خاہوت آتون ءُ۔ اسپیکر سردار ایاز صادق نوکاپی ریلہ ٹی زوال کروک آ بندغ آتا درجہ غاتا بڑزی کن دعاہم کرے۔