مزن وزیر محمد شہباز شریف  ءَ گوشتگ کہ جان سلامتی ءِ محکمہ، پولیو ءِ کارندہ ءُ ہمگرنچیں ادارہ ملک ءَ چہ پولیو ءِ سرجمیں ہلاس کنگ ءِ ہاترا جزمیگ اَنت

اسلام آباد۔19اگست  (اے پی پی): مزن وزیر محمد شہباز شریف ءَ گوشت کہ جان سلامتی ءِ محکمہ، پولیو ءِ کارندہ ءُ ھمگرنچیں توامیں ادارگ ملک ءَ چہ پولیو ءِ سرجمیں ھلاسی ءِ واستہ جزمیگ انت۔ پولیو ءِ ھلاس کنگ ءَ مشکلات است انت بلے اے نا ممکن نہ انت۔ پولیو ءِ مہم آنی تہ ءَ پولیو ءِ کارندہ آنی کلیدی کرد ستا کرز اِیت۔ سئے شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں پریس ریلیز ءِ رد ءَ مزن وزیر محمد شہباز شریف ءَ اے ھیالانی درشانی روٹری انٹرنیشنل فاؤنڈیشن ءِ صدر فرانسسکو اریزو ءِ سروکی ءَ ڈل ءَ گوں گپ ءُ تران کنان ءَ کتگ کہ آ گند ءُ نند ءِ واستہ اتکگ ات۔ گند ءُ نند ءِ تہ ءَ وفاقی جان سلامتی ءِ وزیر صدال مصطفیٰ کمال، پولیو ءِ گر ءُ دار ءِ واستہ مزن وزیر ءِ ھاسیں نمائندہ عائشہ رضا فاروق ءُ سیادی داروکیں مزنیں کارندہ ھوار اتنت۔ مزن وزیر ءَ آئی ءَ پاکستان ءَ چہ مہلکیں نادراھی پولیو ءِ ھلاسی ءِ تہ ءَ میاں اوستمانی گل آنی نیمگ ءَ سرجمیں رنگ ءَ کمک کنگ ءِ سر ءَ منت واری ءِ درشان کت۔ آئی ءَ گوشت کہ جان سلامتی ءِ شوبگ ءِ ٹیم، پولیو ءِ کارندہ ءُ ھمگرنچیں توامیں ادارگ ملک ءَ چہ پولیو ءِ سرجمی ءَ ھلاسی ءِ واستہ جزمیگ اَنت۔ پولیو ءِ ھلاسی ءِ راہ ءَ یقینی چیلنج است انت بلے ما وتی جزم ءُ محنت ءَ گوں پاکستان ءِ زھگ آنی آیوکیں باندات ءَ را ایمن کن ایں ۔ مزن وزیر ءَ گوشت کہ پولیو ءِ ھلاسی ءَ مشکلات است انت بلے نا ممکن نہ انت۔ پولیو ءِ مہم آنی تہ ءَ پولیو ءِ کارندہ آنی کلیدی کرد ستا کرز اِیت۔ ڈل ءَ آلودگی ءِ ھلاپ ءَ حکومتی گامگیج آنی توسیپ کت ءُ امیت سہرا کت کہ مزن وزیر ءِ ھاسیں دلگوشی ءُ سروکی ءِ سبب ءَ پاکستان ءَ چہ اے مہلکیں نادراھی زوت ھلاس کنگ بیت۔ ڈل ءَ پولیو ءِ ھلاپ ءَ جنگ ءَ حکومت ءِ کمک ءَ را برجاہ دارگ ءِ روٹری انٹرنیشنل ءِ عزم ءِ پدا زور دات۔ ڈل ءَ مزن وزیر ءَ را سرپد کت کہ روٹری انٹرنیشنل ءَ گوستگیں سال ءَ پاکستان ءَ پولیو ءِ ھلاسی ءِ واستہ 500ملین ڈالر ھرچ کتگ ات ءُ اے سال ءَ ھمے وڑیں زرّ ھرچ کنگ ءِ جھد ءَ انت۔ ڈل ءَ مزن وزیر ءِ نیمگ ءَ پولیو ءِ ھلاسی ءِ ٹیم ءِ گچین کنگ ءُ ٹیم ءِ نیمگ ءَ چست کتگیں گامگیج آناں ھم ساڑات۔