اسلام آباد ۔ 2 جنوری (اے پی پی) ناشرکاری ءِ ھاسیں آمید گس ءَ پاکستان تحریک ءِ انصاف ءِ چیئرمین عمران خان ءِ ھلاپ ءَ درج بوتگیں ناشرکاری ءِ چار کیس آنی زامنی ءَ را من اِتگ۔ سئے شمبے ءَ آمید گس ءَ ایس ایس پی ءَ را لٹ ءُُ کٹ، پارلیمنٹ ءُُ پی ٹی وی ءِ سرءَ اُرش کنگ ءِ کیس ءَ ھوار چار کیس آنی تہءَ عمران خان ءِ دراج کشیں زامنی ءَ را منظور کنان ءَ عمران خان ءِ جسمانی ریمانٹ ءُُ موبائل فون ءَ را پچ گرگ ءِ پولیس ءِ دزبندی ءَ را رد کت۔ ناشرکاری ءِ آمید گس ءَ جاک ءِ ساھت ءَ چار کیس آنی تہءَ ادارکی زامنی ءَ را منگ ءِ واستہ عمران خان پیش بوت۔ عمران خان ءِ وکیل بابر اعوان ءَ دلیل دات ءُُ گوشت کہ گواہ آں عمران خان ءِ ھلاپ ءَ بیان ناں کہ داتگ ءُُ ناں کہ شاہدی اَست۔ گوشداری ءِ ساھت ءَ پراسیکیوٹر چودھری شفقات ءَ گوشت کہ عمران خان ءَ سرجمیں ملک ءَ چہ باسک آناں جم کتگ، وتاس ءُُ لٹ آں آواناں داتگ ءُُ پدا جوانیں رنگے ءَ ارزشتی ایں سرکاری ماڑی آنی سرءَ اُرش کنگ بوت۔ عمران خان ءِ جسمانی ریمانٹ بہ ریست گڈا موبائل فون ءَ چہ سرجمیں کسّوپچ بیت۔ ناشرکاری ءِ گر ءُُ دار ءِ آمید گس ءَ ’’محفوظ فیصلہ‘‘ دیگ ءِ واستہ عمران خان ءَ را گوانک جت ءُُ ملزم ءِ ساڑی بوھگ ءِ پد ءَ چاریں کیس آنی تہ ءَ دائمی زامنی ءِ جار جت۔
