پاکستان لبنان ، ہنگری ءُُ مالدیپ ءِ گوما یکوئی آناں سک باز ارزشت دنت، سئیں ملک آنی گوما اقتصادی، دود ءُُ ربیدگی ءُُ زانشتی شوبگ آنی ودینگ ءِ واھشت مند اِنت
صدر ممنون حسین ءِ لبنان ءِ دزکش بوھوکیں سفیر مونا التانیرءُُ پاکستان ءِ ہنگری ءُُ مالدیپ ءِ واستہ نامینتگیں سفیر آں گوں گپءُُ تران
اسلام آباد ۔ 2 جنوری (اے پی پی) صدر مملکت ممنون حسین ءَ گوشت کہ پاکستان لبنان، ہنگری ءُُ مالدیپ ءِ گوما یکوئی آناں سک باز ارزشت دنت ءُُ سئیں ملک آنی گوما اقتصادی، دود ءُُ ربیدگی ءُُ زانشتی شوبگ آنی تہءَ گیشی کنگ ءِ واھشت مند اِنت۔ صدر ءِ مملکت ءَ اے گپ لبنان ءِ دزکش بوھوکیں سفیر مونا التانیر ءُُ پاکستان ءِ ہنگری ءِ واستہ نامینتگیں سفیر افتخارعزیز ءُُ مالدیپ ءِ واستہ نامینتگیں وائس ایڈمرل (ریٹائرڈ) وسیم اکرم ءَ گوں گپ ءُُ تران کنان ءَ گوشت آئی ءَ سئے شمبے ءِ روچ ءَ ایون ءِ صدر ءَ جتا جتائیں گند ءُُ نند کت۔ اے موہ ءِ سر ءَ وزارت ءِ درئی کار ءِ ٹوھیں کارندہ ھم ساڑی اتنت۔ صدر ءِ مملکت ءَ لبنان ءِ دزکش بوھوکیں سفیر ءَ گوں گپ ءُُ تران کنان ءَ گوشت کہ لبنان یک زمانگ ءِ سیل ءُُ سواد ءِ بھشت بوتگ۔، آئی ءِ واھشت اِنت کہ ملک ءَ برجائی پیداک بہ بیت ءُُ لبنان ءِ اے بستار یک رند ءِ پد ءَ برجا بہ بنت۔ آئی ءَ گوشت کہ پاکستان ءُُ لبنان ءِ نیام ءَ تجارت، وانگ ءُُ زانگ ءُُ دود ءُُ ربیدگ ءِ شوبگ ءَ گیش گیشی بہ بیت تانککہ دوئیں ملک آنی نیام ءَ اے شوبگ آنی تہءَ کمک ءَ را ودینگ بہ بیت۔ آئی ءَ دزکش بوھوکیں سفیر ءِ ازمت آنی توسیپ کنان ءَ گوشت کہ آئی ءَ دوئیں ملک آنی وت مہ وتی یکوئی ءَ را گیش جھلانکی پیداک کنگ ءِ واستہ ٹوھیں اِزمت ءِ گوما کار کتگ۔ آئی ءَ دزکش بوھوکیں سفیر ءِ آیوکیں باندات ءِ دیمروئی ءُُ وشھالی ءِ واستہ دُعا ءِ نیک کت۔ صدر ءِ مملکت ءَ مالدیپ ءِ واستہ پاکستان ءِ نامینتگیں سفیر ءَ را پنت ءُُ شون دات کہ مالدیپ ءِ گوما بالی ءُُ زرّئی کشک آنی برجائی ءِ سرءَ ھاسیں دلگوشی دیگ بہ بیت تانکہ دوئیں ملک آنی نیام ءَ تجارت ءِ تہ ءَ گیشی بہ بیت۔ صدر ءِ مملکت ءَ ہنگری ءِ گوما ھم تجارتی شوبگ ءِ تالکداری ءِ پڑ ءَ راودینگ ءِ بابت ءَ ھاسیں دلگوشی ءِ پنت ءُُ شون کت۔
