اسلام آباد۔27دسمبر(اے پی پی) ملک ءِ صدر ممنون حسین ءَ گشتگ کہ ملکی سلامتی ءُ مھکمی ءِ ھاترءَ المی اِنت کہ راج ءِ دراھیں تبکاناں پیسلہ سازی ءِ تہا ھوا ر کنگ بہ بیت تنکہ تپاکیں ءُ مھکمیں سوجاں چہ ملک راستیں کشکءَ رھادگ بہ بیت، ناشرکاری ءِ روہتگ بے روزگاری ءَ گوں بندوک اَنت، حکمت عملی ءَ چہ ناشرکاریءِ جیڑھءُ جنجالاناں گرءُ دار کنگ بیت، ورناھ آنی وانگءُ زانگ ءُ تربیت ءُ وھد ءِ سرءَ روزگار پھجارینگ ءَ دراھیں ادارگ وتی کردءَ پیلو بہ کن اَنت۔ ملکءِ صدر ءَ اے گپ نیشنل ڈیفنس مزن شاہ دربرجاھ ءِ 17می کانووکیشن ءَ گوں تران کنانءَ گشتگ، ایشیءِ تہا نیشنل ڈیفنس ءِ صدر لیفٹیننٹ جنرل ماجد احسان ءَ ھم تران کتگ۔ صدر ءَ گشتگ کہ پاکستانءَ ھوار مرچی سرجمیں دنیابازیں جیڑھ آنی دیمپانیءَ کنگءَ اِنت ۔ ایشیءِ سوب اِیش اِنت کہ بازیں دمگ ءُ زباناں گوں سیادی داروکیں مردم نوکیں دورءِ تہا چست بوھوکیں جیڑھءُ جنجالانی ھوالگءَ تاں انگت ایچ وڈیں تچکیں نتیجگءَ سر نہ بوتگ اَنت۔ اے یک انچیں جیڑھ اِت کہ ایشی ءِ سرءَ سرجمیں دنیاءُ پاکستانءَ ھم اے کارانی سرءَ چارءُ بچار جاری اِنت۔ صدرءَ گشتگ کہ اسلام ءُ جدیدیت ، راجی ھم آہنگی، گورننس ، جیڑھءُ جنجالانی گیشءُ گیواری ءُ راجی سلامتی انچیں سرھال اَنت کہ ایشی ءِ سرءَ یکوئی ءَ چارءُ بچار ءُ چاگردءِ دراھیں تبکاں یکجاھ زورگءُ روھگءِ ضلورت اِنت۔
