اسلام آباد۔ 25دسمبر (اے پی پی) صدر مملکت ممنون حسین پارینے کہ چناو ورناک قوم انا آخبت آک ءُ وپاکستان نا نیمہ آبادی ورناتیا تالان ءِ ہراننا سرمایہ غاک ءُ۔ ورناتے بایدے مرے کہ او قائد اعظم نا افکار و تعلیم آتے مون آ تخسا پاکستان نا شونداری و شونہالی کن تینا پبی کڑد ءِ ادا کیر۔ صدر مملکت داہیت ءِ ایوان صدر اٹ قائد اعظم نا سال دے انا بابت اڈ ہلوک آ چناتا پروگرام اٹی تران کرسا پارے ہراٹی چناک تینا عظیم لیڈر ءِ خراج عقیدت پیش کریر۔ صدر مملکت پارے کہ گدرینگوک آ چار سال اٹی ساڑی آ حکومت نا گچین پالیسی تا سوب اقتصادی بشخ اٹی شونداری مسنے۔ اوپارے کہ بروک آ سال انا ایسر اسکان جی ڈی پی نا شرح شش درسد مننگ نا اومیت ءِ و بروک آ مسہ چار سال اٹی دادے ہشت درسد اسکان دننگ نا ڈٹ ءِ۔ صدر مملکت پارے کہ پاک چین اقتصادی راہداری ساڑی آ صدی نا عجوبہ اسے ہراڑآن دا ڈیہہ ناقسمت بدلینگک۔ اوپارے کہ سی پیک نا فعال مننگ آن پد پاکستان دا ڈیہہ نا اہم ءُ ملک اس جوڑ مریک۔ صدر مملکت پارے کہ چندی ملک آتاراہشونک سی پیک اتون منسلک مننگ نا خواہش نا درشانی ءِ کرینو۔ اوپارے کہ پاکستان تون چین ہم داڑآن پبی فائدہ ہرفنگ ءِ۔ چین ہراتینا گڑاتا ترسیل کن دہ ہزار کلو میٹر آن زیات نا فاصلہ ءِ طے کریکہ داسہ او سی پیک نا سوب دافاصلہ کم مرسا دونیم آن مسہ ہزار کلومیٹر آ بسنے۔ صدر مملکت چناتا تعلیم آ خاص چکار کننگ نا گرج آ زور شاغا۔ اوپارے کہ چناک ہراتسکان مرے تعلیم حاصل کیر۔ اوپارے کہ چناتا جوان تربیت کننگ آن جوان ءُ راج اس جوڑ مریک و راج آن اسہ سوگو ءُ قوم اس جوڑ مریک۔ صدر مملکت چناتے انفارمیشن ٹیکنالوجی نا تعلیم آ خاص چکار کننگ نا گرج آ زور شاغا۔ اوپارے کہ آخبت ٹیکنالوجی نا ءِ داڑآن فائدہ ہرفنگ آن بیدس نن شون ہلوک آملک آتیٹی اوار مننگ کپنہ۔ صدر مملکت پارے کہ نن مستین نا غلطی تیان بایدے گڑاس سبخ ہلین و بایدے اواری اٹ مون آ کان۔ اوپارے کہ 2013 ء ٹی میرات اٹی بجلی نا ہرا تنکی ملاسس، اونا مون ءِ توننگانے و بجلی نا لوڈشیڈنگ ءِ چٹفینن۔ صدر مملکت داوخت آ الس ءِ کلہو تس کہ ہموعلاقہ غاتیٹی ہرافتے ٹی بجلی نا بل تفسہ ، ہموخلقت آتیا بجلی نا بل ءِ باقاعدگی اٹ ادا کننگ کن زور شاغنگے تانکہ مچ آ ملک آن بجلی نا لوڈشیڈنگ چٹے۔ صدر مملکت پارے کہ قائداعظم محمد علی جناح ٹی ہمو غٹ خوبیک ساڑی ئسر ہرا اسہ بڑزکو لیڈر اسے ٹی بایدے مروسس۔ اونا سچائی، امانت داری و مخلصی ہمو مملکت ءِ تس ہرا اسہ تغ اس ئس۔ او چناتیا زور شاغا کہ او قائد اعظم ، ڈاکٹر علامہ محمد اقبال و دا دور انا ایلو سرکڑدہ غاتے تینا آئیڈیل جوڑ کیر و اوفتا نقش قدم آ چلینگسا پاکستان نا شونداری ٹی تینا بشخ ءِ شاغر۔ داپروقار انگا دود اٹی اسکول آتا چناک قائد اعظم نا دے انا بابت قومی نغمہ و ٹیبلو پیش کریر ہرافتا صدر مملکت ، خاتون اول بیگم محمودہ ممنون حسین و شرفدار آ مہمان بھاز ستا ءِ کریر۔ دود اٹی گلوکارہ حمیرا ارشد، علی عباس و اویس نیازی ئسک ہم شئیر خلسا قائد اعظم ءِ خراج عقیدت پیش کریر۔ دود انا ایسری آ صدر مملکت چناتے تون ملا و قائد اعظم نا سال دے انا کیک ءِ کاٹ کرے۔
