کوئٹہ۔ 25دسمبر (اے پی پی) بلوچستان اٹی بابائے قوم قائد اعظم محمد علی جناح نا 141می یوم پیدائش قومی جوش و جوزہ اٹ اڈ تننگا۔ صوبائی دارالحکومت کوئٹہ ٹی دے انا بناء 21توپ آتا سلامی اٹ مس وخت اس کہ سرکاری و غیر سرکاری ادارہ غاتا کنڈآن خصوصی دود، سیمینار ، کانفرنس و مذاکرہ غاتا بست و بند کننگا دابابت غٹ آن بھلا دود قائد ریذیڈنسی زیارت اٹ اڈ ہلک ایف سی بلوچستان نا کنڈآن بیرک ءِ چست کننگ نا دا دود اٹی مہمان خاص وزیراعلیٰ بلوچستان نواب ثناء اللہ خان زہری ئس ہراآئی جی ایف سی بلوچستان میجر جنرل ندیم احمد انجم تون اوار قائد ریذیڈنسی زیارت اٹی بیرک ءِ چست کرسا پروقار دود انا بناءِ کرے داوخت آ تران کرسا وزیراعلیٰ بلوچستان نواب ثناء اللہ خان زہری پارے کہ بلوچستان پاکستان نا آخبت ءِ و بلوچستان نا خلقت وطن تون مابت و تینا گل زمین پاکستان تون پیار کروک او نوبلوچستان ءِ امن و شونداری نا جاگہ اس جوڑ کننگ کن نیک نیتی و ویل ویچڑی اٹ کاریم کننگ اُن بلوچستان اٹی دہشت گرد آتا مخ انا ملی ءِ پرغانن دہشت گردی نا برخلاف برجا داجنگ اٹی سیکورٹی فورس و الس بھاز بھلو قربانی اس تسنو، نن قربانی تا بناءِ تینے آن کرینن و تینا سینہ غا سم کنسا الس نا رکھ ءِ کرینن نناویژن خوانوک و پرامن بلوچستان ءِ بلوچستان نا گل زمین قدرتی وسیلہ غاتے اٹ مالامال ءِ الس نا وسیلہ غاتے الس نا شرحالی آ خڑچ کرسا اسہ روشناءُ آخبت اسے نا جوڑ جاڑ کن بے لوث جہد کننگ اُن امن نا دا کوشست آتے ٹی سیکورٹی فورس آک کلیدی کڑد ادا کرینو ہرافتے است آن دننگ کپنہ۔ وزیراعلیٰ بلوچستان سرسہب دود انا اڈتننگ آ ایف سی کن 15لکھ روپئی نا پڑو ءِ کرسا منتظمین آتے خراج تحسین پیش کرے۔ دود اٹی صوبائی وزیر آک، اسمبلی نا باسک آک و بڑزکو سول و فوجی کمامدارآک بشخ ہلکر ۔25دسمبر نا مناسبت اٹ بلوچستان نا غٹ ضلع غاتیٹی خصوصی دود آتا بست بند کننگا ہرافتے ٹی چندی سیاسی ، مذہبی و راجی تنظیم تا راہشونک بانی پاکستان قائد اعظم محمد علی جناح ءِ اونا قومی خذمت آتیا پبی خراج عقیدت پیش کرسا تینا تقریر آتیٹی پاریر کہ مچ آ قوم ءِ قائد نا پاکستان نا رکھ و شونداری و سوگوی کن یکجا مروئی مریک۔
