راولپنڈی۔ 15جون (اے پی پی) پاک فوج انا شعبہ تعلقات عامہ (آئی ایس پی آر) نا ڈائریکٹر جنرل لیفٹیننٹ جنرل عاصم سلیم باجوہ پارینے کہ دہشت گردی نا برخلاف پاک فوج انا آپریشن ضرب عضب نا اولیکو اِراسال اٹی 100 درسد ہدف دوئی کننگانے، آپریشن ضرب عضب ومچ آ ملک اٹی کومبنگ و انفارمیشن بیسڈ آپریشن آک برجاءسلرہ ، طورخم آ پاکستانی دنگ اٹی چیکنگ کن گیٹ انا جوڑ جاڑ کننگ انگ ئِ ،ایلو باضابطہ کراسنگ پوانٹس آ ہم ہنداوڑنا گیٹ جوڑ جاڑ کننگک، انگور اڈہ گیٹ پاکستان نا دنگ اٹی ہلوکہ، غٹ معاملہ غاک فوجی و سیاسی سروک آتا صلابت آن طے کننگانو، آپریشن ضرب عضب اٹی 3500 دہشت گرد خلنگار، 992 دہشت گرد آتا ٹھکانہ غاتے نشانہ جوڑ کننگا، 253ٹن دھماکہ خیز مواد ، 2841 بارودی سرنگ، 35310 مارٹم بمب ہلنگانے، کراچی ٹی امن بحال کننگ کن گچین آپریشن کننگانے۔ او چارشنبے آ آئی ایس پی آر راولپنڈی ٹی آپریشن ضرب عضب نا اِراسال پورو مننگ آ داوخت اسکان مروک آ سرسہبی تا بارواٹی میڈیا ئِ بریفنگ تسکہ، ڈی جی آئی ایس پی آر لیفٹیننٹ جنرل (ر) عاصم سلیم باجوہ پارے کہ اِراسال مست آپریشن ضرب عضب نا بناءمس ، دا آپریشن اس اف بلکن اسہ سوچ اسینا پن ئِ اونا مسخت پاکستان ئِ دہشت گردی آن پاک کروئی ئِ و دہشت گردی آن ہرا ناجوڑیک اریر اونا پوروی اٹ چٹفنگ نائِ۔ اوپارے کہ 15جون 2014ءآن مست مچ آ ملک اٹی دہشت گردی تالان مسوسس ، ہر ارٹ میکو دے دہشت گردی نا واقعہ ، آئی ڈیز آک ترخارہ ، برمتہ کرسا خلقت آتے نوگوایریا ٹی دننگاکہ ، کالعدم تنظیم آتیٹی بھرتی ، خودکش جیکٹس ، گاڈیک تیار مسرہ ، دہشت گردی نا واقعہ غاتے داکان کنٹرول کننگاکہ ، طالبانک اسہ بریبری نا فریق اس جوڑ مرسا سٹیٹ ئِ ڈکیٹ کننگ نا کوشست کریرہ ، 15جون 2014ءآ فیصلہ کننگا کہ اوفتا برخلاف اسہ بامعنی و پورو آپریشن اس کننگک، جنوری 2014ءٹی اوڑتون سیاسی کہول آ ہیت وگپ مس ، مارچ اٹی سیز فائر کریر، اونا نیام اٹ واقعہ 8 جون کراچی ایئر پورٹ آ جلہو مس و دا آپریشن نا فیصلہ کننگا ۔ اوپارے کہ نارتھ وزیرستان مچ آ دنیا ٹی پنی ئس ، ہراکہ دہشت گرد تنظیم نا پن ئِ ہلیس اونا داکان نا نیٹ ورک تون رابطہ ئس ۔ د ا علاقہ دہشت گردی نا گڑھ پاننگاکہ ، دہشت گردی نیٹ ورک تالان مسوسس ، نوگوایریا ئس ، مچ آ ملک آن ہموڑے ہچ گہس ہِننگ کتوکہ، ولدا آپریشن ضرب عضب نا بناءمس ، ہموڑے جتا درجہ غاتیا گھیرہ شاغنگا۔ کے پی کے ٹی کیمپ جوڑ کرسا عارضی وڑاٹ ہمپوک آتے گدریفنگ آن گڈ آپریشن نا بناءکننگا۔ غٹ آن مست وزیرستان نا 36سد مربع کلو میٹر نا علاقہ ئِ دہشت گرد آتیان کلیئر کرفنگا ۔ اوکان گڈ نارتھ وزیرستان اٹی دتہ خیل و مضافات نا 4 ہزار 304 مربع کلومیٹر نا علاقہ ئِ کلیئر کرفنگا۔ اوکان گڈ شوال ویلی ہراڑے جنگل ہم ئس اسہ مشکل ئُ آپریشن اس کرسا کلیئر کننگا و او علاقہ نا خلقت آتا ہمیش کن جان ئِ خلاس کرفنگا۔ دا اوغان بارڈر تون اوار ئس ہنداخاطران ہموڑے بھاز ہن و بر ئس ۔ امریکی ٹروپس آن سلہہ، ازباب ، پوسکن ئُ سلہہ پلاسر دوئی کریر، 992 دہشت گرد آتا ٹھکانہ غاتے نشانہ جوڑ کننگا، 253ٹن دھماکہ خیز مواد ہلنگا، دا دھماکہ خیز مواد آک 15 سال اسکان کاریم اٹ ہتنگارہ ۔ 2841 بارودی سرنگ، 35310 مارٹر بمب ہلکونو۔ دا ہمو قربانیک ئُ ہرافتے نن تسونن، آرمی چیف اکثر دا پاریکہ کہ تینا دتر و قربانی تے وخت اس ہم گم مننگ کن ہلیپنہ۔ دا ہمو قربانی تا ذکر ئِ۔ تقریباََ 500 کارندہ آپریشن ضرب عضب اٹی شہید، 3500 دہشت گرد خلنگانو ، دہشت گردی نا برخلاف جنگ اٹی داوخت اسکان تقریباََ پاکستان 107بلین ڈالر قیمت ادا کرینے، بین الاقوامی برادری ئِ ننا دا قربانی تا اعتراف ئِ کروئی مریک۔ ہراتم وزیرستان اٹی آپریشن ترند مس تو دہشت گردی اوغانستان نا کسر خیبر ایجنسی منتقل مس ، پاک فوج ہموڑے خیبرون و خیبر ٹو انا پن آن آپریشنل ئِ پورو کرے داڑے پاک فوج انا یکونیم ڈویژن داڑے کاریم اٹ ہتنگا۔ داڑے ہم پاک فوج و الس قربانی تسر۔ خیبر ایجنسی ٹی ہم 24سد مربع کلو میٹر نا علاقہ ئِ کلیئر کریر۔ داڑے 900 دہشت گرد ئِ خلنگا، لشکر اسلام ئِ ماس آن کشنگا خسنگا داوخت آ پاک فوج انا 108 ورنا شہید و 385ورنا ٹھپی مسنو۔ اوپارے کہ فاٹا ٹی کلیئرنس کرسا باڈر اسکان رسینگانو۔ اوپارے کہ بارڈر مینجمنٹ اسہ بھاز بھلو چیلنج اسے ۔ 2600 کلو میٹر سیم اوغانستان تون ئِ ، 1350 کے پی کے ٹی ئِ ، 8 کراسنگ پوائنٹ جوڑ مسنو و بھازانگا ک ہنداوڑ ئُ ، ہراجوڑ کروک ئُ پوائنٹس ئُ اوفتے پین گچین کننگ اُن ، و باضابطہ افس، اوفتے کن ایف سی و ایلو فورسز آتے خلنگک۔ اوپارے کہ آپریشن ضرب عضب نا بنائِ کرین تو ردعمل نا خدشہ ئس ، اخس دہشت گرد ئِ ہلنگا اوفتے آن انٹروگیٹ کننگا۔ انٹیلی جنس بیسڈ آپریشن کے پی کے ٹی شروع مسنے و اونا دنگ ئِ پین علاقہ و صوبہ غاتسکان ودفینہ۔ اوپارے کہ پاک فوج ہر نوگوایریا ٹی ہِننگ ئِ تانکہ ہموڑے دہشت گردی نا خاتمہ ئِ کرسا امن اڈ ہلنگ مرے۔ اوپارے کہ لاہور پارک خود کش جلہو آن گڈ پنجاب اٹی 280 انفارمیشن بیسڈ آپریشن کننگانے۔ اوپارے کہ ہراتم آپریشن نا بنائِ کرین تو اسہ ہیت اسیا نن زور شاغسا کرین کہ دا آپریشن بے پرخ مریک و غٹ آپریشن آک ہنداوڑ بے پرخ مسر۔ داکاریم داسکان جاری ئِ ، کومبنگ آپریشن برجاءسلک۔ اوپارے کہ کراچی ٹی دہشت گردی نا واقعہ و نیٹ ورک زور ہلککہ ، کراچی ٹی 1203 دہشت گرد ہلنگانو و خلنگانو ہراڑآن ٹارگلنگ ، برمتہ برائے تاوان نا واقعہ غاک ہم مسنو۔ آپریشن ضرب عضب و کراچی آپریشن آن گڈ دہشت گردی و ڈوہ کم مس ، کراچی ٹی بزنس ، سٹاک ایکسچینج ، زرکاری تون اوار غٹ بشخ آتیٹی ریکارڈ شون شروع مس، کراچی ٹی روشنائیک بحال مسنو۔ داڑے کاریم داسکان ہم جاری ئِ۔ اوپارے کہ آپریشن ضرب عضب داسکان چٹتنے۔ اوپارے کہ عارضی وڑاٹ ہمپوک آتا پدی ہِننگ نا عمل ترندی اٹ جاری ئِ ، داوخت اسکان 61 درسد خلقت پدی ہنانو۔ فوج انا غٹ یونٹس، سول ایڈمنسٹریشن تون اواری اٹ آئی ڈی پیز آتے اُراتیا سرکننگ ئُ ، بنداوی آسراتی تننگ ئُ ، انفراسٹرکچر بلڈنگ آ کاریم ترندی اٹ جاری ئِ ، دیر انا داڑے بھاز ویل ئس، داڑے ناجوڑیک ہم دیر انا سوب ئسر، ہسپتال آتا بھلو ویل ئس ئسک۔ تدوک آ دے ہی آرمی چیف 100 کٹ ہسپتال نا افتتاح ئِ کرے ، وزیرستان نا دا غٹ آن بھلا ہسپتال ئِ ، مسیت و مارکیٹ جوڑ کننگ انگ ئِ ، سکولز ، کیڈٹ کالج جوڑ مننگ ئِ ، 705 کلو میٹر نا روڈ آتا جال اس شاغنگ انگ ئِ ۔ اوپارے کہ طورخم آ بھاز ہجوم ئس ، گاڈی و خلقت آتا چیکنگ نا ہچ ئُ نظام اس ہلوکہ ، پاکستان نا دنگ انا تہہ ٹی طورخم آ اسہ گیٹ اسینا جوڑ جاڑ نا بنامسنے ، اوڑآ ہچ ئُ اعتراض اس مننگ کپک۔
